Gouws: Aanlê sonder aansit

Jare later sit Ernst Bezuidenhout naweke voor die kassie en kyk hoe Prinsloo die een bal ná die ander deur die pale klits.

Hoewel hulle nie juis meer kontak het nie, het die Griekwa-wedstrydwenner as ’n kannetjie van nege jaar oud by Bezuidenhout ’n paar skoplesse gekry wat uiteindelik die grondslag vir sy loopbaan gelê het.

Prinsloo se destyde mentor, nou ’n boer naby Ugie in die Oos-Kaap, het toe vir die Hoërskool Hangklip se eerste span gespeel, terwyl die Poubloues se ster in die Laerskool Hangklip was.

Verlede naweek het Prinsloo se akkurate stewel in die tweede agtereenvolgende Curriebeker-wedstryd ’n leeue-aandeel in Griekwas se oorwinning gehad.

Dié 24-jarige heelagter het onlangs van die krukkelys teruggekeer en sy korrelwerk het éérs gehelp om die Haaie in Durban en daarna die Pumas in Kimberley te verslaan.

Dit volg nadat afrigter Hawies Fourie se span vier wedstryde op ’n streep verloor het. Volgens Prinsloo is die geheim vir goeie stelskopwerk “om dit so eenvoudig moontlik te hou.” “Hoe meer tierlantynjies jy het, hoe meer kanse is daar vir foute,” sê hy aan Rapport.

“Jy moet dit eenvoudig hou en dan ure op die oefenveld deurbring.”

Die druk wat met stelskopwerk gepaard gaan, is dikwels vir skoppers die grootste uitdaging – maar Prinsloo is al gewoond daaraan . . .

“Elke skop is dieselfde. Of jy nou 50 punte voor is en of dit is om die wedstryd te wen – jy moet elke skop dieselfde benader. Dan is jou kans op welslae die beste.”