SA netbal het die afgelope week ’n reuse-tree vorentoe gegee met die aankondiging van die land (én Afrika) se eerste semi-professionele netballiga. Die kompetisie sal bekend staan as die Brutal Fruit-netballiga en oor vyf naweke tussen 10 Mei en 7 Junie in Pretoria plaasvind.
Burta de Kock, breier van die nuwe Vrystaat Crinums-franchise, sê sy en haar spelers is verheug oor die nuwe liga en die kanse wat dit vir alle spelers in die land skep: “Ons werk hard, maar ons werk ook na spesifieke doelwitte. Hierdie kompetisie gee ons nog ’n doelwit en bied ook vir die spelers meer speelkans. En natuurlik gaan dit goud werd wees vir die Proteas in die aanloop tot die Statebondspele.”
De Kock was verlede jaar die afrigter van die Kovsies wat die Varsity-netbalkompetisie en USSA-liga gewen het en was ook aan die stuur van die Mangaung-span wat die SA kampioenskap in Rustenburg gewen het.
Met al die land se grootste titels tans in die trofeekas in Bloemfontein – en die nasionale heldinne Maryka Holtzhausen, Adele Niemand en Karla Mostert steeds ’n integrale deel van die span – sal die Bloemfonteiners vanjaar in elke kompetisie tussen die gunstelinge tel, maar De Kock sê: “Hierdie gaan ’n taai kompetisie wees, want daar is net vyf spanne in ons afdeling en elke naweek sal ’n krag-teen-krag-affêre wees.
“Ons benader dié kompetisie egter baie positief. Dieselfde spelers wat verlede jaar so baie bereik het, is steeds in die groep, saam met jongelinge wat oorloop van passie.”
Al nege provinsies sal ’n span in die kompetisie hê, maar Gauteng het twee: die Jaguars van Noord-Gauteng en die Golden Fireballs in Johannesburg.
Albei dié spanne, sowel as die OP Aloes en Noordwes Flames, sal saam met die Vrystaat Crinums in Afdeling 1 speel. In Afdeling 2 is die Southern Stings (Wes-Kaap), die Limpopo Baobabs, KZN se Kingdom Stars, die Mpumalanga Sunbirds en Noord-Kaap Diamonds.