En dis juis teen die Poemas dat die jong Springbok-stut Frans Malherbe die vertroue wat Heyneke Meyer, die Bok-breier, nogmaals in hom gestel het, uit die staanspoor wil regverdig.
Meyer het Malherbe met ’n plek in sy groep vir die Rugby-kampioenskap beloon nadat beserings tot dusver ’n belowende begin in die Groen-en-Goud in die wiele gery het.
Die Bok-afrigter het onlangs vertel hy was op moedverloor se vlakte toe sy voorslag-vaskopstut Jannie du Plessis kort voor verlede jaar se Europese toer beseer is.
Meyer se vrese oor ’n lamlendige Bok-skrum het in die niet verdwyn toe die 23-jarige Malherbe in moeilike omstandighede kragvertonings teen Wallis en Skotland gelewer het.
’n Ontydige ribbesering in die toets teen die Skotte het Malherbe se indrukwekkende Bok-begin kortgeknip.
“Dit was ’n groot hoogtepunt om in my eerste toets te speel.
“As jy dít eers geproe het, wil jy meer daarvan hê,” vertel die fris Kapenaar met die droë humorsin die afgelope week by die Springbokke se spanhotel aan Rapport.
“Dit is nou ’n goeie kans om my saam met Jannie in die span te vestig.
“Jy kry nie dikwels die kans om teen Argentinië te skrum nie – en dit sal nogal ’n leerskool vir my wees.”
Malherbe meen hy en die ander vaskopstutte in Suid-Afrika kan nie op hulle laat wag nie – veral met volgende jaar se Wêreldbeker-toernooi al nader op die horison.
Malherbe, Coenie Oosthuizen en Lourens Adriaanse het verlede seisoen as aanspraakmakers op die voorgrond getree, terwyl die jong Marcel van der Merwe en Julian Redelinghuys vanjaar fynproewers opgewonde maak.
“Ek het ná die besering (harsingskudding wat hy in die Superreeks opgedoen het) hard gewerk en die afgelope ruk by die Bokke was goeie voorbereiding vir die Rugbykampioenskap.”
En is die baard vanjaar daar om teenstanders die skrik op die lyf te jaag? “Nee, daar is geen storie agter die baard nie.
“Ek was aan die begin eintlik lui om te skeer en het toe van die baard begin hou.
“Ek sal dit waarskynlik in die volgende twee weke afskeer.”
Malherbe steur hom nie veel aan praatjies van vaskopstutte wat dan nou veronderstel is om die meanies in die pak te wees nie.
“Jy het as stut seker twee persoonlikhede – op en van die veld af.
“Ek hou daarvan om sonder fanfaremy ding op die veld te doen en is andersins ook baie rustig.”
Hy sê sy doelwit is om in ’n moderne stut te ontwikkel, maar skrumwerk sal altyd bo-aan die prioriteitslys bly.
“Dit is tog ’n ou se eerste taak.
“Jy kan nie in die skrums laat slaplê omdat jy eerder met die bal wil rondhol nie.”