Publications
Partners
Morné Steyn meen diegene wat voorspel hy sal volgende jaar Suid-Afrika se eerste keuse by die Wêreldbeker-toernooi wees, span die kar voor die perde in.Heyneke Meyer, die Bok-breier, het onlangs lof gehad vir Steyn, wat die afgelope paar seisoene die aanslag van ’n hele paar losskakel-aanspraakmakers – soos Pat Lambie, Johan Goosen en Elton Jantjies – moes afweer.
Mnr. Betroubaar sal in alle waarskynlikheid Saterdag in Perth terug aan stuur van sake wees wanneer die Bokke die Wallabies in die Rugbykampioenskap aandurf.Die 30-jarige Bok-losskakel moes tot dusver in die Kampioenskap met ’n plek op die plaasvervangerbank tevrede wees, terwyl die nuwe Loftus Versfeld-generaal, Handré Pollard, teen die Argentyne die ja-woord gekry het.
Steyn moes verlede Saterdag in Salta in die tweede helfte help met ’n reddingspoging toe die Poemas met oorgawe gebrul en ’n Slag van Salta onafwendbaar gelyk het.
“Dit is nie altyd lekker om op die bank te sit nie. Ek dink Handré het goed gedoen in die twee toetse – en ons ouer manne moet seker besef die jonges gaan in ’n stadium oorvat.”
Steyn, wat vir Stade Français in Frankryk speel, het die afgelope week by die Bokke se spanhotel in Fourways gesê hy is oorgehaal om die Bokke met ’n regrukpoging teen die Wallabies te help.
“Dit is merendeels ek en die skrumskakel wat beheer moet neem en ons wil op óns terme speel en die pas van die toets bepaal.
“Ek glo die agttal gaan dit vir ons makliker maak. Ons het in Salta in die laaste 20 minute ’n bietjie momentum gekry en dit is altyd makliker om op die voorvoet rugby te speel.”
Steyn het al ’n hele paar moeilike skoppe koelkop deur die pale geklits – en die twee doelskoppe en strafdoel in die laaste 20 minute in Salta is geen uitsondering nie.
“Dit was moeilik. Maar dit is die aard van toetsrugby. Wanneer jy vir die Bokke speel, moet élke skop oor wees.”
Steyn sê die Springbokke se klinkende sege verlede seisoen in Brisbane gee die span die selfvertroue en oortuiging om weg van die huis af te wen.
Hy sê dit is goed vir Suid-Afrikaanse rugby dat ’n begaafde speler soos Pollard op die voorgrond tree.
Volgens Steyn help hy sy troonopvolger “met die klein dingetjies” op die oefenveld, “. . . maar ek wil myself nie as ’n afrigter op hom afdwing nie”.
Oor die feit dat hy nog nie ’n gereelde plek in Stade Français se span kon oopspeel nie, sê hy: “Dit was ’n goeie skuif. Ek het verlede jaar nie baie gespeel nie en dink dit was goed vir die lyf.
“Ek het ’n paar seisoene by die Bulle byna in elke wedstryd gespeel.”
