Dit volg nadat die Suid-Afrikaanse Sportkonfederasie en Olimpiese komitee (Saskok) ’n jarelange stryd oor die spanembleem teen Krieket Suid-Afrika (KSA) gewen het.
Saskok het in Julie gedreig om ’n internasionale speelverbod teen die Proteas in te stel as hulle nie met die huidige embleem op hul klere wegdoen nie.
Dié kombinasielogo van die Protea en die landsvlag is strydig met Saskok se voorskrifte. Rapport verneem op goeie gesag dat ’n nuwe vlaglose embleem dié week op die spandrag – waaronder hemde, broeke, oefenklere, kopskerms én pette – aangebring gaan word.
Die Proteas sal volgende maand die eerste keer in die nuwe uitrustings in die reeks van drie eendagwedstryde teen Nieu-Seeland speel.
Daar is glo groot ongelukkigheid by spelers oor die nuwe toetspette wat hulle moet dra as die Wes-Indiese Eilande in Desember in Suid-Afrika toer.
“Daai pet is die een ding wat elke toetsspeler die heel meeste koester,” is uit die Protea-kamp aan Rapport gesê.
“Dit word tydens ’n kort seremonie aan hom oorhandig voordat hy die eerste keer op die toetsveld stap en hy speel daarin tot hy die dag uittree.”