Strauss wou hê die onafhanklike konsultant moes die Cheetahs van kop tot tone kom ontleed. Hy wou die standaarde op alle vlakke in Cheetahs-rugby laat verbeter – en dít was ’n beginselsaak wat hy teen elke prys nie wou prysgee nie.
Ná die Cheetahs se Superrugby-ramp was daar yslike druk op Strauss-hulle as spelers, die bestuur én die afrigtingspan. Ondersteuners eis dat koppe moet rol en Strauss het as die kaptein besluit dat hy as leier agter die skerms ’n verskil wou maak deur die klousule in te sluit. Die konsultant se bevindinge moes glo intern gehanteer word.
Die direksie van die Vrystaat-Cheetahs het egter in ’n dramatiese stap ná Donderdag se vergadering in Johannesburg besluit dat hy Strauss se versoek weier en onderhandelinge beëindig.
Dit volg nadat Strauss op die randjie was om sy kontrak, wat ná vanjaar se Curriebeker-reeks verstryk, met die Cheetahs te verleng.
Daar was reeds soveel sekerheid in plaaslike kringe dat Strauss langer ’n Cheetah sou bly, dat hy die afgelope week deur Puma gebruik is om die Vrystaat se nuwe Curriebeker-truie bekend te stel.
Rapport verneem dat die direksie Strauss se versoek glo geweier het oor lesse wat hy in die verlede geleer het deur soortgelyke vergunnings te maak.
Nadat Strauss meegedeel is dat die klousule nie ingesluit sal word nie, het hy Donderdag net voor middernag die Cheetahs en Bulle ingelig dat hy besluit het om in 2015 sy Superrugby in Pretoria te speel.
Strauss het die Bulle in 2005 en 2006 in Curriebeker- en Superrugby verteenwoordig, maar wou vanweë sakebelange in Bloemfontein nie graag skuif nie.
Hy was glo selfs bereid om vir duisende rande per maand minder vir die Cheetahs te speel.
Sy skuif kan nou reuse-gevolge vir die Cheetahs inhou. Strauss is ’n bekende handelsmerk in Suid-Afrikaanse rugby, word byna as die gesig van Cheetahs-rugby beskou en is ’n rolmodel vir jonges.
Hy is ’n invloedryke speler wat spanmaats beïnvloed om te bly óf te skuif.
Die Cheetahs het reeds die afgelope tyd sterre soos die losskakel Johan Goosen (Racing Metro) en agtsteman Philip van der Walt (Biarritz) verloor – terwyl die flank Lappies Labuschagné (Bulle) en stut Trevor Nyakane (Bulle) ná die Curriebeker-reeks ook koers sal kies.
Die Cheetahs, wat nou onder hewige kritiek deurloop nadat hulle in 2013 die enigste Suid-Afrikaanse span was wat in die halfeindstryde van die Super- en Curriebeker-reekse gespeel het en hoë verwagtinge dus vanjaar van hulle gekoester is, het wel die afgelope tyd daarin geslaag om sterre soos die vleuel Cornal Hendricks en stut Coenie Oosthuizen se kontrakte te verleng. Die slot Lood de Jager en heelagter Willie le Roux bly ook tot einde 2015 Cheetahs.
Aanwinste soos die veelsydige agterspeler Joe Pietersen (Biarritz), vleuel Sergeal Petersen (OP-Kings), veelsydige agterspeler Coenie van Wyk (Leeus/Pumas) en agtsteman Willie Britz (Leeus) sal volgende jaar Super-rugby vir die Cheetahs speel