En dan is daar diegene wat steeds wonder wie presies is Schalk van der Merwe, Robbie Coetzee en Julian Redelinghuys.
Laasgenoemde is die ouens wat nie in 2014 rugby gekyk het nie.
’n Onervare Leeus-voorry, wat voor vanjaar nie een ’n enkele Superrugbywedstryd gespeel het nie...
Trouens, Van der Merwe (23) kon vroeër nie eens die Cheetahs se span haal nie.
Coetzee (25) was ’n versoolde losvoorspeler wat nie ’n deurbraak by die Bulle kon maak nie.
En Redelinghuys (24), die Leeus se nuwe “skrumkaptein”, moes by die Haaie uit die skadu’s van Beast Mtawarira en Jannie du Plessis ontsnap.
Die afgelope ses maande het dié drietal vriend en vyand verras en Springbokke, All Blacks én Wallabies byna weekliks in die skrums gebuig.
Volgens Johan Ackermann, die Leeus se afrigter, is dié welslae aan “baie harde werk” te danke – en etlike skrumsessies saam met die oud-Springbok Balie Swart.
“Dit is almal ouens wat ’n geleentheid by ’n unie gesoek het omdat hulle elders vir ander spelers moes terugstaan,” het Ackermann verduidelik.
“Hulle moes op alle vlakke hard werk en opskerp – aan fiksheid, gimnasium- en veral skrumwerk. Dus is hulle almal vooraf deur ’n baie harde af-seisoen.
“Ek is baie trots op ons skrums. Ons skrumstatistieke lys ons as die voorste span in die kompetisie en dis nie sleg vir ’n eerste keer nie.”
Ná ’n suksesvolle Super-seisoen meen dié breier nóg hope harde werk wag.
“Ons het die ouens vroeg in die jaar uitgedaag om te presteer.
“Vooraf het ons ’n skrumverhouding van 85 % as teiken gestel, maar toe kry ons 91%.”
Volgens hom is veel hoër louere Van der Merwe, Coetzee en Redelinghuys beskore.
“Schalk is ’n lekker aggressiewe speler. Julian se werkverrigting is baie hoog, terwyl hy telkens onder die ouens was wat die meeste duikslae uitgevoer het,” het Ackermann gesê.
“Robbie se agtergrond as losvoorspeler het hom weer baie gehelp en hy dra die bal en maak baie tackles.”
* Buiten dat dié drietal volgende seisoen sáám met 44 Superrugbywedstryde se ervaring sal spog, het die Leeus se diepte in die voorry ook verder uitgebrei...
Willie Wepener, Akker van der Merwe en Malcolm Marx is in die haker-spens, terwyl stutte soos Corné Fourie en Ruan Dreyer ook as impakspelers beïndruk het.
Julian Redelinghuys, Robbie Coetzee en Schalk van der Merwe slyp vroeër vanjaar.
Foto: christiaan kotze