Die klanke van Nkosi Sikelel’ iAfrika het gister by Glasgow se Kelvingrove-rolbalbaan, die Tollcross-swemsentrum én die SECC-sentrum opgeklink ter viering van goue sukses vir Suid-Afrika.
Daarby was Celtic-park die verhoog waarop die land se driekamp-atlete silwer verower het.
Ná drie en ’n half dae van Statebond-aksie was die gemengde rolbalpaar van Herman Scholtz en Gwen Nel en hul helpers Geoff Newcombe en Annatjie van Rooyen die eerste Suid-Afrikaners wat die boonste trappie van die Glasgow-podium bestyg het.
Scholtz-hulle het daardie voorreg verdien deur voor ’n partydige skare in die eindronde van die B2/B3-kompetisie vir sig-gestremdes met 14-10 met Skotland se Irene Edgar en Robert Conway af te reken.
Daarmee het die SA paar die reeks onoorwonne afgesluit en hul eerste welslae by ’n multi-sportbyeenkoms behaal.
’n Paar uur later het die reënboogvlag ook hoog gehang in die SECC-sentrum, waar die Pretorianer Zack Piontek goud gewen het in die -90kg-kategorie.
Piontek was te slim en sterk vir die Skot Matthew Purssey, wat hy in die laaste minuut met ’n yuko verslaan het.
Die Wes-Rander Ruan Snyman het silwer in die +100kg-kategorie gewen, toe hy deur nóg ’n Skot, Christopher Sherrington verslaan is.
Die judo-span spog nou met vier medaljes, nadat Siyabulela Mabulu en Jacques van Zyl brons gewen het.
) Sarel van der Walt berig dat Suid-Afrika kan glimlag oor twee driekamp-medaljes in drie dae.
Richard Murray, Henri Schoeman, Kate Roberts en Gillian Sanders bring silwermedaljes huis toe, nadat hulle net deur Engeland geklop is in die strate van Glasgow.
Murray, wat ook Donderdag brons in die individuele mans-afdeling verower het, was die groot held.
Hy het sy been in die vyfde plek begin, maar met ’n stewige vertoning in die hardloopskof tot tweede opgeskuif.
Hy kon nie die Engelse superster Alistair Brownlee vang nie en het 39 sekondes agter hom oor die eindstreep gehardloop, maar het genoeg in die tenk gehad om die tweede plek met sekonde te bespreek.