De Villiers het al die Bokke se Junie-toetse misgeloop nadat hy die knie tydens ’n Superrugby-wedstryd teen die Cheetahs beseer het.
Die twee maande blaaskans wat hy gekry het, was dalk net die regte medisyne vir die veteraan, wat hoop om volgende jaar ’n slag na die Wêreldbeker-toernooi te gaan sonder dat ’n besering hom knelter.
Die Bok-groep van 30 sal volgende naweek óf die naweek daarna bekend gemaak word, afhangende van die Haaie se sukses in Superrugby.
Dan sal hulle van 4 tot 8 Augustus in Johannesburg bymekaar kom, voordat die toetsweek amptelik op 11 Augustus begin. Daar was nóg goeie nuus vir afrigter, Heyneke Meyer, oor sy gekrokte Bokke.
Pat Lambie, wat gister van die reserwebank vir die Haaie gespeel het, is ook weer wedstrydfiks nadat hy vroeg dié seisoen ’n boarmspier geskeur het, terwyl die Stormers-senter Damian de Allende óók slaggereed is.
De Allende is die soort groot, vernuftige speler waarvan Meyer baie hou – en met dié dat hy maklik in enige posisie tussen die driekwarte kan aantree, is dit waarskynlik dat hy weer opgeroep sal word ná die teleurstelling van sy eerste Bok-kamp.
De Allende moes dié met ’n kniebesering verlaat voordat hy kans gekry het om die Groen-en-Goud te dra.
Met die Kampioenskaps-spangroepe beperk tot net 30 spelers, raak veelsydige manne soos Lambie en De Allende goud werd.
Die Springbokke se mediese span is in voortdurende kontak met dié van die provinsies – en Eben Etzebeth sal ook vuur teen die Argentyne kan verskaf.
Hoe lank en in watter helfte Etzebeth sal speel, moet nog besluit word, maar die groot slot sal genoeg van sy gebreekte enkel en af-toon herstel het om reg te wees vir die Poemas.
Die loting pas die Bokke, wat nogal gespook het met die krukkelys tot dusver.
Hoewel die Poemas nie sonder handskoene gepak kan word nie, is hulle nie van dieselfde gehalte as die All Blacks en die Wallabies nie.
’n Interessante kopkrapper vir Meyer is wie om as derde skrumskakel te betrek nadat Fourie du Preez sy enkel teen Wallis gebreek het.
Jano Vermaak is ’n sterk moontlikheid, veral omdat hy al in die Bok-opset betrokke was, maar daar is fluistering dat die blink, jong Haai Cobus Reinach eindelik opgeroep gaan word.