Daar is waarskynlik net een gewaarborgde manier om Nuweland leeg te
hou (die jare het gewys dat bekerloosheid Kapenaars nie afskrik nie). En dít is
om ’n Junior Wêreldtoernooi-eindstryd tussen Wallis en Argentinië aan te
bied.
Daardie aardige vooruitsig kan vanaand slap voor 21:00 werklikheid
word indien Nieu-Seeland en Suid-Afrika vóór hul onderskeie halfeindstryde teen
die jong Drake en Pumitas dink aanstaande Vrydag se eindstryd in dié
o.20-toernooi is hulle reeds beskore.
Op die oog af moet wedstryde teen Argentinië en Wallis mos niks
meer as ’n drafstappie neffens die Liesbeekrivier verg nie? Nie noodwendig nie.
Die laaste keer toe Wallis en Nieu-Seeland slaags was, het
eersgenoemde met 9-6 gewen. Die uwe het tot die diepe ontsteltenis van sommige
lesers geskryf dat die modderige veld in die Danie Craven-stadion die Kiwi’s
gepootjie het. Maar Willie Lose, die Nieu-Seelandse rugbykommentator, laat val
vandeesweek dat hierdie as die swakste Kiwi-rugbyspan in baie, baie jare beskou
word, en hy voorsien niks goeds wanneer sy jong landgenote om 17:00 teen Wallis
uitdraf nie.
Indien die Kiwi’s hul eerste eindstryd sedert die eerste
o.20-toernooi van 2008 verpas, klink dit mos vanoggend so in die verte in na
Suid-Afrika se eerste groot bekerkans, of hoe?
Maar dís ook nie ’n noodwendigheid nie. Argentinië het vlak voor
die Junior Wêreldtoernooi in Suid-Afrika kom toer. Die Bokkies het die eerste en
derde wedstryd gewen, en die tweede gedeel. Die laaste wedstryd in die
Craven-stadion was egter ’n gemors. Die Bokkies het met 13-5 gewen, maar was
ongetwyfeld die swakkere van die twee spanne.
Argentinië het hulle voorlangs geroer, en powere skakelwerk onder
die Suid-Afrikaners het skitterende agterspelers soos Jan Serfontein en Paul
Jordaan uit die wedstryd gehou.
Serfontein is ’n binnesenter duisend, en dit sal hoogs verdag wees
indien hy ná sy fenomenale toernooi nie ’n benoeming van die Internasionale
Rugbyraad ontvang vir junior speler van die jaar nie.
Die Bok-span wat vanaand speel, lyk wel effens anders as toe. Die
18-jarige losskakel Handré Pollard kry die agterlyn weg en sool die span
vorentoe.
Onderskat Suid-Afrika dié span, verloor hy straks sy vierde
halfeindstryd in soveel pogings.
Maar, hei, daardie tweede helfte van Dinsdag teen Engeland wil ’n
man so hittete laat glo dat dié Bok-span die manpitte het om al die pad te
gaan.
* Afskop: 19:15 (SS1 op DStv)
