Onder hulle is Mimi Coertse, Matthys Roets, Frank Opperman en Casper de Vries.
Die jong sangeres Charlize Berg het talle vertonings en ’n hoofrol in ’n ander rolprent van die hand gewys om aan Talent te werk.
Toe moes sy hoor daar is nie tans geld om dit te verfilm nie.
Die komediant Casper de Vries het ook sy dagboek oopgehou vir dié rolprent.
De Vries en Berg koester egter nie kwade gevoelens teenoor die vervaardigers nie.
“Dit is maar hoe dit in die bedryf gaan. As daar nie genoeg geld is nie, kan die produk nie gemaak word nie.
“Ek verstaan hul posisie,” het De Vries gesê.
Talent handel oor ’n sangkompetisie. Musiek van ou Afrikaanse treffers tot kwaito en operamusiek word gebruik om die storie te vertel.
Cobus Rossouw, vervaardiger, sê dit is waar dat kunstenaars en die produksiespan hul dagboek oopgehou het, maar die omstandighede is ongelukkig buite enigiemand se beheer.
“Almal is betaal vir werk wat gedoen is per kontraktuele ooreenkomste.”
Hy sê ’n private belegger, wat 25% van die produksiekoste sou finansier, het ’n geldelike krisis beleef wat daartoe gelei het dat die fliek uitgestel moet word. Skietwerk word nou vir Oktober beplan.
Rossouw sê voorts Talent gaan ’n “baanbreker” wees in die Afrikaanse rolprentbedryf.
“Dit vertel die storie van ’n versugting na roem en sukses. Dis propvol komedie, drama en liefde.”