’n 26-jarige konstabel en haar 27-jarige manskollega was op patrollie in die Imizamo Yethu-plakkerskamp in Houtbaai toe hulle trompop deur ’n onbekende persoon in hul voertuig geskiet is.
Dit kom ná die moord op Mpumelelo Xakekile (50), ’n metropolisielid, wat ook op ’n kort afstand langs die N2 doodgeskiet is terwyl hy aan diens was.
Die vroue-konstabel is op die toneel dood en haar kollega ’n paar uur later.
Hul onderskeie families in die Oos-Kaap sou gistermiddag oor hul dood ingelig word.
Die provinsiale polisiekommissaris, lt.genl. Arno Lamoer, het die skietvoorval skerp veroordeel en sê die aanval op die polisielede is ’n aanval op die staat.
Niemand is teen druktyd in hegtenis geneem nie.
In ’n ander voorval het nog ’n Wes-Kaapse polisieman gesterf toe hy Donderdag tydens ’n nasionale fiksheids-kompetisie in Gauteng skielik inmekaar gesak het.
Konst. Andrew Donovan Don (35) van Piketberg is na die Kempton Park-hospitaal gebring, waar hy eergisternag beswyk het.
Volgens ’n polisiewoordvoerder blyk dit dat Don aan natuurlike oorsake dood is. Hy was ’n fiksheidsinstrukteur.
’n Johannesburgse kollega, ao. Maud Botes, sê sy en Don het Woensdag saam hul goue medaljes ontvang.
“Hy was ’n geliefde mens. Sy goeie gees en liefde gaan vorentoe vreeslik gemis word by hierdie kompetisie.”
Don laat sy verloofde, Shamila Miranda, en hul drie kinders agter.