Publications
Partners
Pres.
Jacob Zuma het die miljoene armes en werkloses beloof die ANC gaan
vandeesweek by sy beleidskongres in Midrand ‘n “reuse-sprong” maak om
hul
ellende te verlig – hy was egter tjoepstil oor wat presies dié
“radikale” beleidstandpunte gaan behels om transformasie ingrypend te
versnel.
“Enige
rewolusie bereik ná bykans twee dekades ‘n punt waar jy besluit of jy
reguit aangaan en of jy moet afdraai,” het Zuma Dinsdagoggend tydens sy
openingsrede aan die sowat 3 500 afgevaardigdes by Gallagher Estate,
gesê.
Volgens
hom het die ANC geen ander keuse gehad as om tydens die destydse
onderhandelingsproses “absolute noodsaaklike toegewings” te maak nie.
Die
ANC was ook versigtig om die ekonomie te herstruktureer en dit het
daartoe gelei dat wit mense, “veral wit mans”, vandag steeds in beheer van
die ekonomie is.
Dít
moet verander. “Ons moet terugkeer na die basiese en die moeilike
besluite neem wat ons in 1994 nie kon neem nie,” het Zuma gesê. Hy het
dit egter
duidelik gemaak enige dramatiese beleidsveranderings gaan binne die
raamwerk van die Grondwet gebeur.
Hy
het met spesifieke verwysing na die grondvraagstuk gesê: “Ons standpunt
is die beginsel van gewillige koper en gewillige verkoper moet hersien
word.
Dit stoot grondpryse op en vertraag grondrestitusie. Maar ons wil dié
vordering maak binne die raamwerk van die Grondwet en die reg.”
Die
grondkwessie het die luidste toejuiging van die afgevaardigdes
uitgelok, veral toe Zuma ook verwys het na die wet van 1913 wat swart
mense van
hul grond onteien het. “Die pynlike proses sal volgende jaar ‘n 100 jaar
gelede gebeur het,” het Zuma gesê, met indirekte verwysing daarna dat
die onregte van die verlede steeds nie ongedaan gemaak is nie.
Oor
Suid-Afrika se mineraalhulpbronne het Zuma gesê debatte by die kongres
moet oor meer gaan as “om net te nasionaliseer of nie”.
“Maar
die Vryheidsmanifes stel dit dat die mense van die land sal deel in die
rykdom van die land. Minerale rykdom is ‘n nasionale bate wat aan almal
behoort en die staat is die soewereine beskermheer daarvan.”
Zuma
het ook die navorsingspan oor nasionalisering se bydrae tot die debat
verwelkom en gesê afgevaardiges moet bespreek hoe die staat ‘n gelyke
deel
in die minerale rykdom van Suid-Afrika kan bekom en “hoe die
gemeenskappe by mynbedrywighede sal baat.
Hy het ook gesê swart ekonomiese bemagtiging het suksesse gehad, maar dat dit nie die nodige verskil te weeg gebring het nie.
‘n Ekonomiese ontleder aan die rand van die kongres het aan Rapport
gesê dat dit duidelik
is swart ekonomiese bemagtiging gaan moet omvorm. “Maar nie Zuma of die
beleidsdokumente is duidelik oor hoe die omvorming gedoen gaan word
nie.”
Zuma
het laat gistermiddag gedurende ‘n perskonferensie weer die onderwerp
aangeroer maar nie besonderhede verstrek nie en gesê die afgevaardigdes
moet met die oplossings vorendag kom.
“Die ANC is die regerende party, as ons dit nie doen nie (noodsaaklike besluite en veranderings doen nie) versaak ons ons plig.”
