Nel het sy kaalvuis-aanslag op die lemnaeler begin deur hom te konfronteer met ’n aaklige, bloedige gesigfoto van Reeva Steenkamp.
“Daar’s dit, kýk, mnr. Pistorius,” het Nel gevuur, “... aanvaar verantwoordelikheid vir wat jy gedoen het!”
Hy sál nie kyk nie, het Pistorius tussen rou snikke in ’n bewende stem geantwoord waar hy in die getuiebank letterlik inmekaar gekrimp het.
... ’n Grys, skynbaar verwarde Shrien Dewani – in teenstelling met die ure lange pyniging van Pistorius in die getuiebank – al oogknipperend vinnig in en uit die beskuldigdebank was in die hooggeregshof in Kaapstad.
Dié Britse sakeman is eindelik ná talle juridiese jakkalsstreke deur Brittanje uitgelewer om tereg te staan vir die huurmoord op sy vrou, Anni, in November 2010 in Kaapstad. Sy vlug op ’n private straler uit Bristol het Suid-Afrikaanse belastingbetalers R2,5 miljoen gekos.
En pres. Jacob Zuma het seker amper soos Pistorius ineengekrimp toe hy hoor Max Sisulu, die speaker van die Nasionale Vergadering (NV), het besluit om die Nkandla-skandaal voor die verkiesing te ondersoek.
’n Ad hoc-komitee gaan glo “deurnag” werk om Thuli Madonsela se Nkandla-verslag te weeg en nog voor die verkiesing daaroor verslag te lewer.