Die taal waarin die artikel geskryf is, bestaan mos darem nou werklik nie.
Waarom moet Afrikaans verkrag en verguis word? Of is dit nie bedoel om Afrikaans te wees nie? En wat soek dit dán in ’n Afrikaanse koerant?
Dan is daar die rassistiese aanslag waar wit mense as karikature uitgemaak word.
Wat sal met my gebeur as ek skryf oor die onder-die-rok-geskel van gesuipte bruin mense? Maar Trantraal het vrypas om te beledig wie en wat hy wil. By geen van die honderde wit mense by wie ek al gekuier het, het ons ons skoene uitgetrek en op die vloer gesit nie.
Ook nie met ons voete op die restaurant of koffiekroeg se tafel nie. Trantraal maak asof dit algemeen is.
My laaste punt: Wit “onderdrukking” kan onmoontlik nie 400 jaar (1614) oud wees nie. Toe was daar nog nie wit mense in Suid-Afrika nie, Trantraal. 300 jaar gelede was kontak tussen wit en anderskleuriges te min vir enige wit mens om as onderdrukker gebrandmerk te word. 200 jaar gelede was daar probleme op die Oos-Kaapse grens en dié tyd kan eerder gesien word as onderdrukking van die wit mense. Daarom het die Groot Trek plaasgevind.
Selfs 100 jaar gelede (1914) was die Britsgesinde Suid-Afrikaanse Party van Louis Botha en Jan Smuts aan bewind.
Hulle het alles in hul vermoë gedoen om die Britte tevrede te hou. Dus, Trantraal, en al die politici wat so geredelik die rassekaart van onderdrukking wil voorhou: kry jou datums reg voordat jy ’n gat van jouself maak.