Dit was 'n baie hartseer week vir my en Suid-Afrika. My vriend Sarel van Sabie, 'n baie unieke kosstem in ons land, is onverwags oorlede.
Sarel het ontsaglik baie vir my beteken.
Met sy kenmerkende bandana om die nek, die mooiste, grootste glimlag en met 'n botteltjie wyn onder die arm het hy altyd met 'n klein gehuurde karretjie voor ons deur stilgehou wanneer hy in die Kaap was. Ons kon dan vir ure gesels oor kos, die lewe en ons passies. My vriend was 'n nederige man en hy het ongelooflik baie vir ander mense beteken juis omdat hy meer aan hulle as aan homself gedink het.
Sarel was 'n gesinsman en was baie lief vir sy vrou, Lieze, en hul kinders. Hy het altyd 'n staaltjie gehad om te vertel van wat by die huis aangaan.
Sarel het ook 'n lekker sin vir humor gehad. As dominee het hy altyd vir my (wat lief is om 'n paar swetswoorde te gebruik en baie lief is vir my wyn) gesê: “Nella, ek gaan jou in die hemel in-bid.”
Hy het natuurlik 'n groot en aansteeklike geesdrif vir kos gehad wat hy met die hele land gedeel het, en het baie bereik in sy kort lewe. Hy laat nou 'n groot leemte in die Suid-Afrikaanse koswêreld en in my lewe, maar ek is baie dankbaar dat ek hom geken het.
Vandag kook ek my Sondagmaal vir jou, ou vriend. Jou familie, vriende en Suid Afrika groet jou – en ek hoop jy kook nou vir die MasterChef daar bo.
Rus in vrede, Sarel van Sabie.
Sarel Loots en Anél Potgieter.