Maar in ’n nuwe boek word nou onthul dat Chaplin, wat nie eintlik van die skoner geslag gehou het nie, meer as 2 000 vroue bed toe gesleep het.
Hy het blykbaar ook ’n obsessie met jong meisies gehad – en hulle almal baie sleg behandel.
Peter Ackroyd skryf in Charlie Chaplin die akteur het vroue nooit vertrou nie. Chaplin, wat op Kersdag 1977 oorlede is, het wel gereeld gespog oor sy slag met vroue en hoe hy tussen die lakens baljaar het.
Die feit dat hy in sy middel- 20’s ongekende sukses met sy flieks behaal het en een van die herkenbaarste mans ter wêreld was, het sy vlerkslepery ’n verdere hupstoot gegee. Al was sy kop net te groot vir sy tenger postuur en kort lyfie, was hy steeds aantreklik vir vroue.
Toe hy in 1926 in ’n onderhoud met Vanity Fair gevra is om sy ideale vrou te beskryf, het hy gesê: “Ek is nie juis verlief op haar nie, maar sy is tot oor haar ore toe verlief op my.”
Chaplin het van die een verhouding na die volgende gegaan, meestal met vroue jonger as 18. Sy eerste vrou, Mildred Harris, was net 16 jaar oud toe sy Chaplin in 1918 ontmoet het.
Ná hul troue het sy gekla: “Charlie het met my getrou en toe van my vergeet.” Sy het ook gekla hy was kort van humeur. Hulle is twee jaar later geskei.
Een van sy buite-egtelike verhoudings was met Peggy Hopkins Joyce, ’n fortuinsoeker wat met vyf miljoenêrs getroud was.
Nog ’n verhouding wat die tonge laat klap het, was sy hofmakery van Lita Grey (15). Hy het vir haar ’n rol in sy trefferfliek The Gold Rush gegee.
In die middel-1940’s was Chaplin in verskeie hofsake gewikkel wat sy openbare beeld negatief beïnvloed het. Die moeilikheid het ontstaan uit sy affair met Joan Barry, ’n aspirant-aktrise. Sy was obsessief en is twee keer in hegtenis geneem nadat sy en Chaplin uitmekaar is.
Chaplin was vier keer voor die kansel, waarvan drie huwelike in die skeihof geëindig het.
Saamgestel deur Karin Burger. Bron: Daily Mail.