Sy was die derde oudste kind van baron Georg von Trapp en sy eerste vrou, Agatha, wat in 1922 aan skarlakenkoors oorlede is.
Omdat Maria self aan skarlakenkoors gely het, moes sy uit die skool gaan en tuisonderrig ontvang. Hiervoor is die geestige non Maria Kutschera deur Von Trapp as goewernante aangestel.
Kutschera hét, soos haar karakter in die rolprent (vertolk deur Julie Andrews) met ’n lelike rok aan en ’n kitaar onder die arm by die Von Trapps se weelderige landgoed opgedaag soos dié treffer-rolprent van 1965 dit voorgestel het.
Anders as in die rolprent, was die baron nie die streng fluitjieblasende karakter wat vrees by sy sewe kinders in hul matroospakkies ingeboesem het nie. Hy is deur sy kinders onthou as ’n liefdevolle man wat baie tyd saam met hulle deurgebring het.
Hoewel Kutschera haar bedenkinge gehad het toe Von Trapp die jawoord vra, het sy nogtans ingestem en die baron en die goewernante is in 1927 getroud.
In haar outobiografie het Kutschera-Von Trapp later geskryf: “I really and truly was not in love. I liked him, but didn’t love him. However, I loved the children, so in a way I really married the children. I learned to love him more than I have ever loved before or after.” Sy was gebroke toe hy in 1947 aan longkanker oorlede is. (Sy is eers in 1987 op ’n rype 82 aan hartversaking oorlede.)
’n Stukkende hart het egter nie haar gees gebreek nie. Vir die volgende 40 jaar het sy letterlik en figuurlik die kitaar geslaan, deur dik en dun.
Danksy ’n musiekblyspel en die latere rolprent het die gesin internasionale roem verwerf. Hulle het ’n ski-oord, die Trapp Family Lodge, in Vermont begin en bemark. Weens ’n bank-ineenstorting in die laat 1930’s het die gesin alles verloor. Hulle het weer welgesteld geword, maar in 1980 was daar nog ’n terugslag toe die ski-oord afgebrand het.
Die afgelope week, met die heengaan van Maria Franziska von Trapp, is ’n era weliswaar verby, maar die heuwels in Vermont en die wêreld deur bly springlewendig met die nalatenskap van haar en haar wêreldbekende gesin.
Die Von Trapps van die rolprent.