Die Koning Mswati III- Internasionale Lughawe het Swaziland al sowat $280 miljoen (sowat R3 miljard) uit die sak gejaag sedert bouwerk 11 jaar gelede begin het.
“Die koning dink mense het bekende lughawens soos O.R. Tambo na hulself genoem,” het Lucky Lukhele, woordvoerder van die Swaziland Solidariteitsnetwerk, gister gesê.
“Ek dink nie hy besef hierdie mense is deur ander vereer nie.”
Maar Percy Simelane, ’n regeringswoordvoerder, ontken die koning het ’n ydel streep. “Ek het dan self na sy toespraak geluister waarin hy gesê het hy moes ‘diep nadink oor die idee’ nadat sy adviserende komitee met die voorstel gekom het.”
Om internasionale verkeer na Swaziland te lok, het Simelane gesê deel van die bemarkingstrategie kan wees om te beklemtoon dit is gesonder om dáár te land as in Johannesburg omdat die lug skoner is.
“Ons gaan nie bemarkers aanstel wat vir O.R. Tambo werk nie. Ons gaan ons eie mense hê,” het Simelane gesê.
Daar is nog nie ’n datum bepaal wanneer die eerste vlugte sal opstyg en land by die nuwe lughawe nie.
“Dit sal op die meeste nog ’n jaar wees. Ek sal eerder sê maande,” het Simelane gesê. Simelane wou nie sê wie die lugdienste is wat belangstel om die lughawe te gebruik nie.
Die enigste lugdiens wat tans Swaziland toe vlieg, is SAL se Airlink.
AFP berig die lughawe het nog glad nie ’n lisensie by die Internasionale Lugvaartvereniging (Iata) gekry nie en lugdienste staan allermins tou die lughawe te gebruik.
Simelane het gesê die lughawe sal die land ’n ekonomiese inspuiting gee.