Bana Lawan, voorsitter van die Chibok- plaaslike owerheid, het Woensdag aan die Nigeriese media gesê die meisies het hul aanhouers ontvlug.
Die families van die meisies het nie die regering van hul ontvlugting in kennis gestel nie, het Lawan gesê.
’n Ongeïdentifiseerde senior amptenaar in Borno het die afgelope week aan Reutersgesê 53 meisies het vroeër ook uit aanhouding ontsnap.
Daar is dus nou nog 164 meisies wat gevange gehou word, het die bron gesê. 221 meisies is middel April deur dié terroristegroep ontvoer.
Boko Haram dreig om die meisies te verkoop as die Nigeriese regering nie hul kamerade, wat in die land aangehou word, vrylaat nie.
Die Nigeriese militêre hoof, lugmaarskalk Alex Badeh, het Dinsdag gesê amptenare weet presies waar die meisies aangehou word.
Erika Gibson berig die meisies is klaarblyklik met die hulp van hoogs gesofistikeerde onbemande vliegtuie opgespoor.
Badeh het aan Radio Nigerië gesê hy het goeie nuus vir die kinders se ouers.
“Ons weet waar hulle is, maar ons kan nie te veel daaroor sê nie. Ons weermag kan hulle terugkry, maar ons sal hulle nie doodmaak in pogings om hulle terug te kry nie.”
Sowat 20 000 Nigeriese soldate is gemobiliseer om met die hulp van Westerse tegnologie die operasie van stapel te stuur.
Die VSA verskaf die meeste van dié onbemande en bemande vliegtuie, terwyl Frankryk, Brittanje en China ook help.
Die VSA se Afrika-bevelspos het gesê al sy vliegtuie is onbewapen en word net in ’n verkenningsrol aangewend.