Johannesburg. - Verbruikers wat kniediep in die skuld is, bly versigtig om meer
skuld te maak, veral in die lig van plaaslike en internasionale ekonomiese
ontwikkelinge.
Die swakker aptyt vir krediet kan daartoe lei dat rentekoerse vir langer laer
gaan bly, meen ekonome.
Uit die nuutste privatesektor-kredietverleningsyfers, wat gister
deur die Reserwebank bekend gemaak is, blyk dat kredietverlening aan die private
sektor in Julie 5,7% hoër was as in Julie verlede jaar. Dit is ’n matige
verbetering van Junie se hersiene groeisyfer van 5,3% op ’n jaargrondslag.
Die groei in verbandvoorskotte, ’n kategorie wat histories teen
gemiddeld meer as 20% op ’n jaargrondslag toegeneem het, was in Julie 2,9% hoër
as in Julie verlede jaar. Mnr. Freddie Mitchell, ekonoom van Efficient Group, sê
dit is onveranderd van Junie en dit lyk asof verbruikers eerder hul skuld
afbetaal as om nuwe skuld aan te gaan.
Mnr. Christo Luüs, ekonoom van Ecoquant, sê dit weerspieël ook dat
verbruikers vanweë hul hoë skuldvlakke nie sommer by banke geholpe raak nie en
dat hul vertroue broos is.
Die groei in die M3-geldvoorraad het in Julie tot 5,6% op ’n
jaargrondslag verlangsaam van die groei van 6,1% in Junie. Op ’n maandgrondslag
is groei van 1,7% in Julie aangeteken.
Me. Carmen Altenkirch en mnr. Dennis Dykes, ekonome van Nedbank, sê
dié stel syfers sal nie ’n bron van kommer vir die Reserwebank wees nie omdat
daar geen bewyse is van ’n sterk vraag na krediet
van verbruikers nie.
Mnr. Johan Rossouw, ekonoom van Vunani Sekuriteite, sê die monetêre
data is ’n verdere bewys van die volgehoue brose kredietherstel, waar hoë
vlakke van skuld ’n demper plaas op verbruikers se aptyt vir krediet.
Hy sê dit regverdig ’n rentekoers-scenario van “laer vir
langer.”
Nedbank hou steeds by die siening dat rentekoerse onveranderd gaan
bly tot in Mei volgende jaar.
Sake
