Johannesburg. – Ekonome se verwagtinge vir Suid-Afrika het vanjaar
deurgaans meer pessimisties geraak.
Die deelnemers aan Sake24 se Ekonoom van die Jaar-wedstryd het van
Mei vanjaar elke maand hul ekonomiese groeiverwagtinge vir vanjaar en volgende
jaar verlaag.
Ekonome het in Februarie vanjaar nog verwag dat die ekonomie
vanjaar met 2,8% sou groei en volgende jaar met 3,4%.
Dié konsensusverwagtinge het egter teen Desember tot
onderskeidelik 2,4% en 2,9% teruggesak.
Hoewel die ekonome in Desember taamlik seker kon wees oor vanjaar
se groeikoers, verskil hulle steeds oor hoeveel beter die ekonomie volgende jaar
gaan vaar.
Fanie Joubert van Unisa en Carmen Nel van Rand Merchant Bank meen
die ekonomie gaan aanstaande jaar stadiger groei en hul vooruitskattings van
onderskeidelik 1,5% en 2,2% is die laagste.
Dr. Roelof Botha van PwC verwag die sterkste groei van 4,1% en 18
uit die 33 deelnemers verwag groei van 3% of meer.
Die deelnemers is ook steeds bekommerd oor die groeiende tekort op
die lopende rekening. Hul konsensusverwagting is dat dié tekort ’n kumulatiewe
bedrag van R181,37 miljard vir 2012 sal beloop.
Die ekonome het in Februarie ’n tekort van slegs R118,63 miljard
verwag, maar hul vooruitskattings het elke maand al hoe groter gerek.
Die kumulatiewe handelstekort vir vanjaar het aan die einde van
November tot ’n rekord van R104,6 miljard verbreed en ekonome is bekommerd dat
dit verdere druk op die rand sal plaas.
Die deelnemers verwag die gemiddelde wisselkoers van die rand
teenoor die dollar sal in die vierde kwartaal R8,67 wees.
Hul konsensus oor die wisselkoers het sedert Februarie met sowat
70c verswak en 22 deelnemers aan die wedstryd verwag dat die gemiddelde
wisselkoers vir die vierde kwartaal R8,70 of swakker sal wees.
Die ekonome verwag dat die gemiddelde inflasiekoers vir volgende
jaar byna dieselfde sal bly as vanjaar se 5,7%. ’n Swakker rand kan inflasie
egter verder opjaag.
Die deelnemers moet elke maand 14 ekonomiese veranderlikes voorspel
en dit word dan deur prof. Eon Smit, voormalige direkteur van die Universiteit
van Stellenbosch se Bestuurskool, in konsensusramings verwerk.
Dié konsensusramings gee ’n aanduiding van die beste ekonome in
die land se verwagtinge van die ekonomie.
