Publications
Partners
Johannesburg. – Die ombudsman vir finansiële adviseurs en tussengangerdienste (Fais) het in nog twee gevalle beslis dat die Gautengse adviseur Deeb Risk geld moet terugbetaal aan twee afgetredenes wat op sy advies in die eiendomsindikasies van Sharemax belê is.
Noluntu Bam, die Fais-ombudsman, het reeds ses beslissings teen Risk uitgereik waarin hy gelas is om altesame R3,08 miljoen aan beleggers terug te betaal weens oortredings van die Fais-wet.
In die jongste beslissings is hy gelas om R815 000 en R170 000 plus rente aan onderskeidelik ’n 69-jarige en ’n 86-jarige vrou van Gauteng terug te betaal.
Dít is nadat ’n hofaansoek van Risk om die Fais-ombudsman te verbied om beslissings teen hom uit te reik, in September met koste van die hand gewys is.
In die jongste gevalle het Risk beleggings by vooraanstaande portefeuljebestuurders omgeskakel na die beleggings in Sharemax. Van die geld van die 69-jarige is onttrek aan lewensannuïteite.
Soos in die vorige beslissings teen Risk het Bam bevind dat hy nie met die nodige noulettendheid opgetree het om seker te maak die Sharemax-beleggings is gepas vir sy kliënte nie.
Die beleggers is konserwatiewe beleggers en die belegging in Sharemax is aan hulle voorgehou as een met ’n lae tot matige risiko. Die ombudsman sê dit dui daarop dat Risk nie die produk verstaan het nie, omdat Sharemax beleggers in die prospektusse waarin die beleggings bemark word, wys op die risiko wat die belegging inhou.
Sy het bevind dat die kliënte nie ingelig is oor die volle implikasies van die omskakeling van hul beleggings nie.
