Kaapstad. – Die 24 m²-speelkamer
van Anthea Peters se plek van veiligheid – ’n deel
van die Eersterivier-bemagtigingsentrum in die stad – spog met ’n splinternuwe
vloer van sowat 25 000 herwonne kurkproppe.
Die kurkproppe – hoofsaaklik afkomstig van wyn- en slaaibottels –
is deel van sowat 40 000 herwonne kurkproppe wat sedert Oktober verlede jaar as
deel van ’n korporatiewe maatskaplike projek deur die Vineyard-hotel-en-spa in
Nuweland ingesamel is. Die projek is deur mnr. David Wibberley, die hotel se spyseniersbestuurder, begin in samewerking met Amorim
Cork SA en CFS Flooring.
Wibberley het die projek begin nadat hy gelees het hoe dikwels
brande in informele nedersettings ontstaan weens die gebruik van
paraffienstofies.
“Kurk is nie net baie vuurbestand nie, maar is ook elasties,
duursaam en veroorsaak nie maklik allergieë nie,” sê Wibberley.
Die projek het groot steun gekry van hotelgaste asook verskeie
wynplase met wie die hotel in vennootskap is.
Die hotel se vyf wynvennote, Klein
Constantia, Waterford, Simonsig, Warwick en Meerlust, neem deel aan die projek
sowel as ander wynplase soos Groot Constantia, Villiera, Buitenverwachting,
Boschendal en Cape Point Vineyards.
Sommige van hulle het selfs versamelpunte in hul kelders waarin
besoekers gebruikte kurkproppe kan plaas.
Die hotel se volgende kurk-projek is
waarskynlik die lê van ’n kurkvloer vir ’n tehuis
vir gestremdes.
Dit het ’n oppervlakte van 100 m² en die hotel se gaste, personeel en wyn-vennote is ywerig besig om
sowat 100 000 kurkproppe daarvoor in te samel.
Sake
