UPINGTON. – Upington26-laan en Dr. Nelson Mandela-rylaan is van die
nuwe straatname waaraan Upingtonners dalk gewoond sal moet raak as voorstelle
hiervoor deur die //Khara Hais-raad goedgekeur word.
Scröderstraat, genoem na die stigter van Upington, se naam sal dan
verdwyn.
Die voorgestelde naamsveranderinge is gister aan die raad voorgelê.
Dit sal nou na die onderskeie wykskomitees verwys word en openbare
vergaderings sal in April gehou word om die publiek kans te gee om kommentaar te
lewer.
Die kommentaar sal daarna aan die munisipale advieskomitee voorgelê
word.
Die voorstel is dat Lemoenweg, van die ingang van Keimoes se kant
af, oor Le Rouxstraat en Malherbestraat tot waar dit die N14 bereik, Dr. Nelson
Mandelarylaan moet word.
Upington26-laan is die voorgestelde naam vanaf Ou Keimoesweg deur
Hillstraat tot in Schöderstraat tot by Absa-bank.
Ander voorstelle is dat Swartmodderweg na Anton Lubowski-straat
verander word, en Rondomstraat na eerwaarde Aubrey Beu-kesstraat.
Mnr. Wikus Snyman van die DA en die Onafhanklike Demokrate (OD) het
gevra dat hul teenstemme genotuleer word teen ’n voorstel dat die Danie
Kuys-stadion die Dicky Jacobs-stadion word.
Die Upington 26 is ’n groep van 26
mense wat in Mei 1989 op gebrekkige getuienis van ’n enkele staatsgetuie skuldig
bevind is aan die moord op konst. Lucas Sethwala wat op 13 November 1985 gepleeg
is ten tyde van openbare onluste.
Altesaam 14 van hulle is ter dood veroordeel, maar dié vonnis is
verander toe die moratorium op die doodstraf ingestel is.
Die res het geringe
vonnisse uitgedien nadat die aanklag teen hulle na openbare geweld verander is.
Oudpres. Nelson Mandela het in 2001 ’n eredoktorsgraad
van die Universiteit van die Vrystaat en die destydse Technikon Vrystaat
ontvang.