POTCHEFSTROOM. – Die Gereformeerde Kerke in Suid-Afrika (GKSA) gaan ’n omkeerstrategie uitwerk en deurvoer in ’n poging om die dalende lidmaattal van dié kerkverband te stuit.
Die algemene sinode het hierop besluit op versoek van die streeksinode Vrystaat en KwaZulu-Natal.
Dié streeksinode het aangevoer dat die destydse wit GKSA 41 jaar gelede, in 1971, 104000 lidmate gehad het.
Laat ’n mens die swart gemeentes wat later bygekom het buite rekening, het die lidmaattal gedaal tot 63000. Dit is ’n daling van byna 40%.
Boonop is net 16% van dié lidmate nou dooplidmate of kinders, teenoor die 38% in 1971.
In die proses is daar baie gemeentes wat eenvoudig nie meer lewensvatbaar is nie.
Volgens die streeksinode moet die GKSA baie meer doeltreffend wees om mense buite die GKSA met die evangelie te bereik en hulle die kerk in te bring.
Oudl. Koos Muller van Frankfort het gesê die kerk het die waarheid. Hy wou weet wat is fout met die verpakking waarin die kerk dit vir die wêreld aanbied.
Hy het gesê die GKSA moet ’n paradigmaskuif maak. As hulle dit nie doen nie, is hulle “missionêr steriel”.
Dr. Flip Buys, een van die kerk se mees ervare sendelinge, het gesê hy het oor die wêreld gesien dat kerke wat so ’n omkeerstrategie aanpak, wonderlike resultate gesien het.