Publications
Partners
JOHAN STEYN (56) van Bloemfontein, pa van die Springbok-losskakel Morné Steyn, moet teregstaan op ’n aanklag van die beweerde diefstal van hek-toerusting en -onderdele van duisende rande.
Steyn sr. is vroeër vanjaar weens die beweerde diefstal in hegtenis geneem, maar die saak is weens ’n gebrek aan getuienis nooit op die hofrol geplaas nie.
Die direkteur van openbare vervolging (DOV) het egter intussen beslis hy moet vervolg word.
Steyn sr. het gister op ’n aanklag van die beweerde diefstal van hektoerusting en -onderdele van meer as R30000 voor landdros V. Pillay verskyn.
Die staat beweer hy het op 15 Februarie 11 motorhekke, ’n motorhuisdeur, die onderdele van vier hekmotors, drie laser-ogies en 60 afstandbeheerders ter waarde van R33694 van Tanya Janse van Rensburg in Kolbestraat, Oranjesig, gesteel.
Steyn sr. wat ’n onderneming bestuur wat elektriese hekke aanbring, het gister senuweeagtig in die beskuldigdebank gelyk.
Voor sy verskyning het hy ook onophoudelik gebewe.
Landdros Pillay het die verhoor tot 4 Oktober uitgestel en hom op waarskuwing vrygelaat.
Adriaan Janse van Rensburg het gister namens Johan Kramer, van Kramer, Weihmann en Joubert-prokureurs, vir Steyn sr. opgetree.
Patrick Saliwa het aangekla.
