NIE net is die ANC 100 jaar oud nie, maar die organisasie (ook die regering van die dag) word gekonfronteer met van die grootste interne konflikte sedert sy ontstaan.
In so ’n mate dat die MK-veterane onlangs gevra het vir die uitstel van die nasionale konferensie van die ANC wat einde 2012 in Mangaung moet plaasvind.
Die motivering was dat die ANC in hierdie proses vernietig kan word.
Op talle vlakke word die burgery ook gekonfronteer met die verskynsel van ’n verswakkende staat en het burgerlike verset in onlangse jare in die vorm van diensleweringsopstande die hoogte ingeskiet.
’n Ander kommerwekkende neiging hou verband met die sekurokratisering van die staat. Hierdie neiging manifesteer in terme van wetgewing ten opsigte van die beheer van inligting, voorstelle ten opsigte van ’n media-tribunaal, die militarisering van die polisiemag (militêre range ensovoorts), die veranderende rol van die intelligensie-instellings en selfs voorstelle ten opsigte van die herinstelling van ’n staatsveiligheidsraad.
Die groter sentralisering van mag hou verband met die voorafgaande en word onderskryf deur die dominante rol van Luthuli-huis (party versus die Uniegebou – regering en regime) en nuwe voorstelle ten opsigte van die herafbakening van provinsies.
Laasgenoemde kom neer op ’n vermindering van hierdie entiteite asook die voorgestelde veranderende plek en rol van plaaslike regering binne die konteks van ’n ontwikkelingstaat-benadering.
Laasgenoemde beteken groter staatsintervensie wat betref strategiese voorkeure soos armoedeverligting, werkskepping, maatskaplike sekuriteit, landelike ontwikkeling, onderwys, gesondheid en die stryd teen misdaad en korrupsie.
Die groenskrif oor grondhervorming is ’n voorloper tot belangrike nuwe wetgewing met waarskynlik verreikende implikasies vir sake soos die grondwetlik verskanste vertrekpunt van gewillige koper en verkoper.
Die verwagting bestaan dat die Mangaung-konferensie van die ANC die weg sal voorberei vir ’n ingrypende grondwetlike wysiging of wysigings in 2013.
Dus, 2012 gaan politiek gesproke van besondere belang wees vir die Suid-Afrikaanse politieke bestel, vir die konsolidasie van ons nuwe demokrasie (of juis die teenoorgestelde), maar ook vir die oudste bevrydingsbeweging op die vasteland.
Wat duidelik is, is dat 2012 ons politiek fundamenteel gaan raak en dat die politiek na afloop van die jaar heel anders daar kan uitsien as wat tans die geval is.
Vir die bygelowige hou die Maya-kalender se magiese datum van 21/12/2012 (baie na aan die beoogde Mangaung-konferensie van die ANC) dalk tog betekenis.
Desnieteenstaande beloof 2012 om politiek aan die verwagtinge van ’n interessante jaar te voldoen.
• Prof. André Duvenhage is ’n politieke ontleder verbonde aan die Noordwes-universiteit.