Publications
Partners
’n BEJAARDE man en ’n werker van ’n veiligheidsmaatskappy op Smithfield is in hegtenis geneem omdat hulle glo ’n vermeende inbreker aangerand het.
Gert Seegers (75) en Willie van Zyl (56), die operasionele bestuurder van die veiligheidsmaatskappy WA en vennote, is byna ’n week nadat hulle Lebohang Makwae (25) vir huisbraak aangekeer het, ook in hegtenis geneem.
Makwae, wat Vrydag deur Van Zyl en ander veiligheidsbeamptes aangekeer is nadat hy by Seegers se huis ingebreek het, het glo aan polisiebeamptes gesê Seegers en Van Zyl het hom met ’n pistool aangerand.
Hulle is Dinsdagoggend by die Smithfield-polisiekantoor weens aanranding met die doel om ernstig te beseer in hegtenis geneem.
Hulle het reeds in die hof verskyn en is op R500 borgtog vrygelaat. Sers. Yanga Ngcukana, polisiewoordvoerder, het bevestig Makwae, wat voorheen tronkstraf uitgedien het vir huisbraak, het ’n wond aan sy kop en kneusplek aan sy regterknie.
Seegers en Van Zyl het ontken hulle het Makwae aangerand en sê hy is waarskynlik beseer toe hy deur die palisadeheining gekruip het. “Ek het nie eers ’n vuurwapen nie. Die polisie kan maar my huis deursoek. Ek het nie aan hom geraak nie. Hy moes homself seergemaak het toe hy gevlug het,” sê Seegers. Volgens hom is daar verlede jaar al sewe keer by sy huis ingebreek. Makwae was glo vir drie van dié inbrake verantwoordelik.
Makwae het berg toe gevlug toe die veiligheidswagte hom jaag.
Van Zyl sê Makwae het mank geloop toe hy van die berg kom en het reeds ’n wond teen sy kop gehad. “Oom Gert (Seegers) het nie eers aan hom geraak nie. Die oom is oud.” Volgens hom het polisiebeamptes nie die regte prosedures gevolg toe hulle aangekla is nie.
Die man wat hulle in hegtenis geneem het, het hom nie geïdentifiseer nie en was kaalvoet. “Ek voel verneder en wil nie eers meer in die dorp bly nie.”
Die twee mans moet weer op 24 Januarie in die hof wees terwyl Makwae Donderdag op ’n aanklag van huisbraak in die hof verskyn.
