Publications
Partners
KAAPSTAD. – ’n Handvol mense wat aan ’n uiters skaars bloedvatsiekte ly, gebruik Viagra om aan die lewe te bly.
Daar kon nog net sowat 30 Suid-Afrikaners opgespoor word wat aan dié skaars siekte, pulmonêre arteriële hipertensie, ly.
Die siekte veroorsaak dat te min bloed deur die longe vloei weens bloedvate wat erg vernou het. Dit veroorsaak hoë bloeddruk in die longe.
Daar is dus te min suurstof in die bloed, verduidelik dr. Michiel Prins, ’n kenner van dié siekte verbonde aan die Universiteit van die Vrystaat se departement van interne geneeskunde.
’n Aktiewe middel in Viagra, genaamd sildenafil, maak die bloedvate oop.
“Dit is ’n baie skaars bloedvatsiekte.
“In Frankryk is ’n studie gedoen wat toon net 15 uit ’n miljoen mense het dit,” het Prins by navraag gesê.
’n Longoorplanting is in sekere gevalle die enigste redding vir baie siek lyers.
Mnr. Denneys Niemandt (52) van Kaapstad is die voorsitter van die Suid-Afrikaanse Pulmonêre Hipertensie-vereniging.
“Ek is so kortasem dat ek suurstof moet gebruik as ek die bal tien keer vir die hond gegooi het. Saans moet ek met suurstof slaap, maar van ons lede moet die hele tyd suurstof gebruik,” het hy gister gesê.
Hy is drie jaar gelede, ná baie toetse, met die siekte gediagnoseer.
“Die siekte is só skaars dat baie dokters en siekefondse dit nie eens ken nie. Hulle dink dit is hoë bloeddruk. Ek dink ook daar is dalk meer mense wat daaraan ly. Hulle word net nie reg gediagnoseer nie.”
Oor die wêreldbekende pilletjie, waarvan hy deesdae die generiese produk drie keer per dag moet sluk, het Niemandt gesê: “Die mense spot my baie, maar die pil werk so hard aan my longe dat dit geen ander uitwerking het nie.”
Die simptome van pulmonêre arteriële hipertensie sluit in:
- Borspyn, veral wanneer oefening gedoen word;
- hoesbuie en kortasem;
- geswelde enkels en bene;
- lighoofdigheid, veral as jy trappe klim of opstaan; en
- floute.
Lees meer by www.phsa.co.za.
