JOHANNESBURG. – Dit is gans te moeilik vir entrepreneurs om sake-ondernemings in Suid-Afrika te begin.
Veral vroue het die wind van voor, het Lindiwe Mazibuko, DA-parlementêre leier, gister op Vrouedag in Katlehong, aan die Oos-Rand, gesê.
“Soos ons almal weet, is dit nie maklik vir entrepreneurs in Suid-Afrika om suksesvol te wees nie.”
Die Wêreldbank lys Suid-Afrika 44ste ter wêreld vir ‘gemak om ’n sake-onderneming te begin’, het sy gesê.
Dit is ver agter ander ontwikkelende lande soos Mauritius wat 15de is, Egipte 21ste en Chili in die 27ste plek.
“Dit neem tipies 19 dae en vyf prosedures om ’n sake-onderneming in Suid-Afrika te begin. In Nieu-Seeland verg dit net een dag en een prosedure.”
Sy het vroue in Katlehong geprys wat sake-ondernemings begin het ondanks struikelblokke en historiese agterstande.
“Dié vroue het waagmoed. Hulle het hul eie sake-ondernemings begin al is daar min geleenthede.
“Ek hoop baie ander vroue sal in hul voetspore volg.”
Mmusi Maimane, nasionale DA-woordvoerder, het gesê dit is noodsaaklik dat jong meisies in Suid-Afrika betyds met skoolopleiding begin en deeglike onderrig ontvang.
“Ons moet dit moontlik maak vir vroue om entrepreneurs te wees en hul eie sake-ondernemings te bedryf.”
Hy het gesê Suid-Afrika se ekonomie moet eerder daarop fokus om geleenthede vir jong mense te skep as om toelaes uit te deel.
“Vroue moet die vryheid hê om ’n goeie werk te kan doen, toegang tot behoorlike gesondheidsorg te hê en die geleentheid kry om hul drome te verwesenlik,” het Maimane gesê.
Volksblad
