Ngamalungu aphuma kumabandla asixhenxe enkonzo iBaptisi yeli lo Mzantsi Afrika athe aphuma iphulo lokonyuka intaba yetafile ngomgqibelo weveki ephelileyo, kwiinzame zokumanya abantu abatsha.
La mabandla aquka elaseGugulethu, eKhayelitsha, eMfuleni, eCrossroads, eKraaifontein, Kalkfontein kunye ne Paarl.
Ngokutsho komthanjiswa uLoyiso Ndaliso, nokhokhela ibandla lase Gugulethu nongomnye wabaququzeleli beli phulo, injongo yabo ibukukuhlanganisa ulutsha lweenkonzo zabo. “Besifuna udibanisa ulutsha lwenkonzo yethu silubonise ukuba ubomi benkonzo abuphelelanga ecaweni kuphela,” utshilo uNdaliso.
Uthe bafuna ukubabonisa intsha ukuba zikhona ezinye izinto abanozibandakanya kuzo ngaphandle kwase nkonzweni.
U-Ndaliso uthe uninzi lolutsha lukubona ukunyuka intaba njengento yabantu abafuna ukuzilolonga.
“Sithe masinyuke intaba sisonke nokuba umntu unomzimba ongakanani nokuba umde okanye umfutshane,” utshilo uNdaliso.
U-Ndaliso uthe injongo ibi kukonyuka le ntaba beyimbumba bade baye kufikelela kwinkcochoyi bese yilo mbumba. Wongeze ngelithi okubalulekileyo ibe kukunikana inkxaso kude kufikwe enkcochoyini.
U-Ndaliso uluqhwabele izandla ulutsha lwale nkonzo ngokunika eli phulo inkxaso, watsho esithi beliphume ngobuninzi balo.
“Ube yimpumelelo umsitho wethu kuba uninzi lolutsha lwamabandla ethu belukhona kwaye umyalezo luwuvile,” utshilo uNdaliso.
Uthe phambi kokuba bonyuke intaba baye baluxelela ulutsha ukuba eyonanto ibalulekileyo kukusenzisana, hayi ukuba ngubani ofike kuqala enkcochoyini.
“Baye bakubona ukubaluleka kokusebenzisana nezinto eziye zifumananeke xanisenza kanjalo kunokuba umntu azenzele ezinye izinto eyedwa,” utshilo uNdaliso.
Uthe imisitho eloluhlobo yinto ababanayo minyaka le, kwaye baceba ukwenza omnye ungaphelanga lo nyaka.