Publications
Partners
S
ithanda ukukhuthaza nokumema abafundi ukuba bazibandakanye nathi ngokuhlomla nokuthabatha inxaxheba kuyo yonke into epapashwe kwi City Vision.
Ungakwenza oko ngokuthi uthumele umyalezo wakho kwezinkcukacha zilandelayo: idilesi ye emeyile: News@cityvision.co.za okanye Thulani@cityvision.co.za
Kanti ungasindwendwela nakumakhasi ethu onxibelelwano uFacebook: City Vision Live okanye uTwitter: @cityvisionlive kungenjalo usindwendwele phantsi komnatha othi www.news24.com ukhangele iCity Vision.
Siyakuthi sipapashe zonke izimvo zenu kwiphephandaba le veki elandelayo. Njengenxalenye yephulo lethu lesiXhosa sicela intsingiselo yezi zaci kunye neli qhalo. Zonke iimpendulo esithe sazifumana siya kuzi papasha kwi City Vision yeveki elandelayo.
Sicela zonke impendulo zifike kuthi phambi koLwesibini.
ISACI: Ukuqinisa imihlathi?
ISACI: Ukuvuza izinkcwe?
IQHALO: Umlomo awunasiziba?
Iimpendulo zeveki edlulileyo:
. Ukuhlekwa ziintaka:
Lulutho “Dlova” Mbinda; Makhaza: Ukuhlekwa ziintaka kukuhlekwa ngumntu wonke ube usengxakini.
Anelisa Beja; Nyanga East: Kukwenza into engeyiyo.
Phiwe Jakuja; Nyanga East: Ukungapumeleli kulonto ubuyenza.
Luvo Marwanqana; SiteB: Ukuhlazeka esidlangalaleni, ngenxa yezenzo zakho.
Nonkqubela Duda; Philippi: Umntu owaziwa ngezinto ezimbi kungafunwa, noba eze emizini.
Zwelinzima Tyhaliti; Harare: Kutshiwo kumntu oyintlekisa, umntu ohlekwa ngabantu bonke ngokokude anga-angahlekwa naziintaka ezi imbala.
Buyiswa Magqaza; Harare: Xa kuhlekiswa ngawe ude uhlekwe nangabantu abangaqhelanga kuhleka.
Sibongile Tshukula; Gugulethu: Xa usengxakini be ngathi wonke umntu uyayibona imeko okuyo.
Yakhanani Xeketwana; Harare: Ukuhlekwa ziintaka kuthetha ukuphoxeka.
Lusanda Mpange; Philippi: Ukwenza into ezintloni.
Zoleka Njoli; Site B: Kukuba nesithukuthezi,ube lilolo.
Nomthandazo Gungqa; Crossroads: Kutshiwo xa uswele ungenanto uthi yo ndihlekwa nazintaka kuba andinanto.
Nomathemba Tabata; Site B: Kuxa kuhlekiswa ngawe ngumntu wonke.
Zukiswa Mdunyelwa; Makhaza: Ngumntu osokola kakhulu athi xana kukudala ezama athi nokuba ndihlekwa nazintaka kunini ndisehla ndisenyuka.
Siyolise Dyani; Mandela Park: Kukuphoxakala.
. Inkal’ ixinge etyeni:
Anelisa: Ukuzifaka engxakini ongenako ukuzikhuphakuyo.
Phiwe: Xa usiva kunzima.
Nonkqubela: Xa usenza into engade iphumelele kuthiwa inkal’ ixinge etyeni.
Ncamile Xhamntwana; Makhaza: Kutshiwo xa kunzima ukufumana isisombululo.
Zwelinzima: Yingxubakaxaka akufumaneki sisombulo kwinyewe esukuba igwadlwa.
Buyiswa: Ingxaki ongakwazi phumela kuyo.
Sibongile: Ukuzifaka engxakini ongenakuzikhupha kuyo.
Yakhanani: Kukungxamela ukwenza into iphinde ikuxake.
Lusanda: Ukuba sengxakini ongasoze uphume kuyo.
Zoleka: Kukuba sengxakini ekunzima ukuzikhupha kuyo.
Nomthandazo: Yingxaki engakwazi usombululeka uthi hayi ke ngoku inkal inxinge etyeni.
Nomathemba: Kukuxakwa yinto engaphumeleliyo.
Zukiswa: Kukuphela kwethemba ungazazi mawuqale ngeyiphi.
Siyolise: Kukuxakana nento.
. Ikhuba lithengwa ngokubonwa:
Anelisa: Umntu ufuna into kuba eyibona.
Phiwe: Ukuze wonele yinto xa uzakuyitenga inga ungayibona ngeliso le nyama.
Ncamile: Kulungile ukuba uzibonele ungeva ngoku xelelwa.
Zwelinzima: Apha kubhekiswa kumntu othi azame ngazo zonke iindlela ukuba loo nto asukuba efuna ukuthi loo nto ayenzayo ibonwe futhi ihandwe ngabanye abantu ngokuthi ayenze elubala.
Sibongile: Into entle ibonwa emntwini.
Yakhanani: Ithetha ukuba kukubona into emva koko uyenze.
Lusanda: Into uyithenga ngokuyijonga.
Zoleka: Kukuba nomdla wento ngokuyibona.
Nomathemba: Ukuqhayisa ngento onayo.
Zukiswa: Kuthethwa ngomntu oveza umzimba ngaphandle athi wakukhuzwa athi lithengwangobonwa.
Siyolise: Ezinye izinto uzenza ungazicebanga.
Ngokwenkcazela yombhali ncwadi uMnu E.W.M Mesatywa, nazi impendulo zezaci nala maqhalo eveki endlulileyo.
Ukuhlekwa ziintaka: Kubhekiswa kumntu olilolo ofana nesikhova. Kaloku isikhova sisoloko sihlekw zezinye intaka. Kubhekiswa nakubantu ababhujelweyo, baze bangahambi phakathi kwabanye abantu, nabo bangahanjelwa kuba bengekakhutshwa ehlathini.
Inkal’ ixinge etyeni: Kuxa umntu angene engxakini ekunzima ukuzikhupha kuyo.
Ikhuba lithengwa ngokubonwa: Wonke umntu unga angazibonela into, angevi ngokuviswa. Kunjalo ngakumbi kwaXhosa, kuba wohamba umhlaba, enga loo nto ayifunayo angayibona, akholwe yiyo phambi kokuba ayithabathe. Abantu bayalahlekelwa kwezi mini ngokuthenga nge posi izinto abangazibonanga, zize zifike kubo zingeyyiyo laa nto bekuthiwe ziyiyo.
Amagama eveki edlulileyo:
Isele:
Anelisa: Inyoka nesele; ngabantu abangavaniyo.
Phiwe: Inyoka nesele.
Nomaphelo Mabutya; Phillipi: Inyoka nesele; abantu abangavaniyo.
Ncamile: Inyoka nesele; abantu okanye izinto ezizi ntshaba.
Zwelinzima: Ukuba lisele; kubhekiswa kumntu omile kakubi kangangokuba akanakufaniswa nanto emhlabeni ngaphandle kwesele.
Buyiswa: Inyoka nesele; abantu abangevaniyo kude babulalane
Zoleka: Umdudo wamasele; isisiphithiphithi sento engenamkhondo.
Nontuthuzelo Solani; Gugulethu: Isele lixoxo ngelinye igama; Ixoxo nexoxo liyazigxumeka...Sukube kubhekiswe kubantu abazinyhala entweni okanye kulonto bazinyhala kuyo, kuthiwe ixoxo nexoxo liyazigxumeka.
Nomthandazo: Isele; xa into ingalungi kuthiwe hayi le into inesele.
Nomathemba: Umdudo wamasele; xa abantu besenza into engafaniyo.
Umvundla:
Anelisa: Umvundla uzekindlela; lufuzo.
Phiwe: ukuvundla.
Nomaphelo: Umvundl’uzekindlela; ukufuza ngokugqithisileyo.
Nonkqubela: Umvundla uzek’ indlela ngumntwana ofana notata wakhe, enzeyonkinto eyenziwa nguyise.
Ncamile: Umvundla uzek’indlela; ukufana twatse, ncam.
Zwelinzima: Umvundl’uzek’indlela; ngumntu osekhondweni labadala ngofuzo nangazo zonke izinto athi azenze.
Buyiswa: Umvundla uzek indlela; izinto ezifanayo ngakumbi abantu.
Ntuthuzelo: Umvundla uzek’indlela; sukube kubhekisele kumhambi omgama ngeenyawo.
Zoleka: Umvundla uzekindlela; umntwana ofuze omnye wabazali bakhe ngokwenza izinto.
Nomthandazo: Umvundla uzeki indlela; yo guys ithini inkcazelo? Funeka uphinde apho usuka khona.
Nomathemba: Umvundla uzekindlela; xa usenza into oyiboneleyo kumzali wakho.
Elokuqwela:
Sicela usinike isaci okanye iqhalo kunye nenkcazelo ngala magama alandelayo:
Izinyo?
Umlomo?
Sithi Huntshu kuni nonke, ukwanda kwaliwa ngumthakathi.
