S
ithanda ukukhuthaza nokumema abafundi ukuba bazibandakanye nathi ngokuhlomla nokuthabatha inxaxheba kuyo yonke into epapashwe kwi City Vision.
Ungakwenza oko ngokuthi uthumele umyalezo wakho kwezinkcukacha zilandelayo: idilesi ye emeyile: News@cityvision.co.za okanye Thulani@cityvision.co.za
Kanti ungasindwendwela nakumakhasi ethu onxibelelwano uFacebook: City Vision Live okanye uTwitter: @cityvisionlive kungenjalo usindwendwele phantsi komnatha othi www.news24.com ukhangele iCity Vision.
Siyakuthi sipapashe zonke izimvo zenu kwiphephandaba le veki elandelayo.
Njengenxalenye yephulo lethu lesiXhosa sicela intsingiselo yezi zaci kunye neli qhalo.
Zonke iimpendulo esithe sazifumana siya kuzi papasha kwi City Vision yeveki elandelayo.
ISACI: Igqabi likalonji.
ISACI: Ukuba ligqabi.
IQHALO: Elokufa alityeli.
Iimpendulo zomhla wama 20 kweYomnga:
. Umdudo woononkala:
Zuki Mdunyelwa, Harare: Yinto ewilizelayo engenamkhondo.
Vuyiseko Ndabeni, Site B: Isiphithi-phithi okanye ukungevani.
Zoleka Njoli, Site B: Kulapho kunganqandwa mntu (sisiphithiphithi).
. Inkal’ixinge etyeni:
Zuki: Kubasengxakini ungazazi ungaphumela njani.
Vuyiseko: Ukungena engxakini ongakwazi ukuphuma kuyo.
Zoleka: Kuxa umtu esengxakini engakwazi kuphumela ngaphaya.
. Akulahlwa mbeleko ngakufelwa:
Zuki: Akunakuthi ngemeko ekwehlele namhlanje uzibone sele uphelelwe bubomi; thatha msinyane, yonke into uyifumana lula.
Vuyiseko: Musa ukuyi ncama into kuba ungayi fumenanga; zingisa ude uyifumane.
Zoleka: Ithetha ukuthi noba izinto zingakuhambeli kakuhle, musa ukunikezela; zama.
Umdudo woononkala: Esi saci sibhekisa kwimeko esi siphithi-phithi, nokuba kusentlanganisweni, wonke umntu ethetha ngaxeshanye, kungekho kundiliseka.
Inkal’ixinge etyeni: Kuxa umntu engene engxakini ekunzima ukuzikhupha kuyo.
Akulahlwa mbeleko ngakufelwa: Liqhalo elithetha ekubeni athi umntu ofelweyo ngabantwana, kubonakale ukuba uyancama ukuthi woze abuye abe nomnye. Yindlela yokukhuthaza ukuba umntu makangancami kuloo nto ayenzayo.
Amagama omhla wama 20 ku Disemba:
Impumlo:
Vuyiseko: Ukuvuma ngempumlo. Ukuvuma ungavumi.
Zoleka: Ukuthwala impumlo: Kukuba nekratshi.
Unyawo:
Vuyiseko: Unyawo lwemfene. Into efihlakeleyo engaqondakaliyo.
Zoleka: Unyawo alunampumlo. Ithetha ukuthi musa ukumphatha kakubi umntu kuba ungamazi usaya kuphambukela kwakhe.
Elokuqwela:
Sicela usinike isaci okanye iqhalo kunye nenkcazelo ngala malungu omzimba alandelayo:
Indlela?
Umlomo?