Wonwabisa abantu abadala uceba

Bezixhelelw’ exhukwana iingwevu nengwevukazi ezingama 90 ezisuka eKuyasa, Endlovini nase Tafelsig ngethuba u ceba wakwa wadi 99 uBongani Ngcani ebapha iingubo kunye nezinto ezisiwa phantsi kwempumlo ngoLwesibini eKhayelitsha.

U-Ngcani uthe wanikeza ngezi zipho kumsitho obubanjelwe kwiholo yoluntu iThusong ngelithi ufuna bafudumale abantu abadala kwiingqele zobusika.

Umakhulu uNozuko Dyalvan (60), wase Ndlovini, uthe intle lento bayenzelwa nguceba kwaye iyabonwabisa.

“Siyayithanda lento siyenzelwa apha namhlanje kuba njengabantu abadala kuninzi okusehlelayo ezindlini zethu nokungasonwabisiyo,” utshilo uDyalvan.

Uthe impilo yoninzi lwabo ayikho kwisimo esihle, kwaye iindawo abahlala kuzo zinegalelo.

“Ibingase sakhelwe izindlu kuba sesingenampilo intle nje kungenxa yendawo esihlala kuzo inkonzo ezininzi asinazo,” utshilo.

Inkonde uEdgar Sikweza (81), wase Tafelsig, uthe uyavuya kakhulu ukubona ukuba bakhona abantu abaye babakhumbule nanje ngabantu abadala.

Uthe uninzi lwabo aluthathi ntweni ngoko ke ingubo ezi baziphiwayo zizakubanceda bahlale befudumele kobu busika.

“Ezi ngubo zizakusinceda kakhulu kuba abanye bethu asinazo kwaye side saba sifumana nento eya phantsi kwempumlo lonto iyasonwabisa kakhulu,” utshilo uSikweza.

Waleke ngawathi ngumnqweno wakhe ukuba uceba wabo aqhube esenza ngoluhlobo ukwenzela bona bantu badala bazibone bebalulekile eluntwini.

U-Ngcani uthe kuba kuqala ubusika yena nequmrhu lakhe baye bahlala phantsi badlana indlebe ngabanokwenza ukukhawulelana nemiceli mngeni ejongene nabanye babantu abadala.

Uthe baye baceba ukuba bahlale nabantu abadala bazoku phalaza imbilini zabo ngendlela abaphetheke ngazo ekuhlaleni.

U-Ngcani the uye wachitha isizumbulu seemali engange R50 000 kwingxowa yeofisi yakhe ukuze abe uyakwazi ukuthenga ezi ngubo aphinde enze nesi sidlo sasemini.

U – Ngcani uthe yinto abayenza minyaka le kwi ofisi yakhe ukuqinisekisa ukuba abantu abadala abaziboni benga hoyekanga.