Publications
Partners
KUKHETHWE umshayeli wetekisi ovelele esifundazweni sakwaZulu-Natal ngempelasonto .
Lolu hlelo belugqugquzelwa inhlangano yobumbano ezimele yemboni yamatekisi ngenhloso yokuxwayisa abashayeli ukuthi abashayele ngokucophelela, bahloniphe imithetho yomgwaqo baphinde baphathe kahle abagibeli ngendlela efanele.
Luqale nyakenye lapho kwacelwa umphakathi ukuthi uvotele abashayeli abaziphatha ngendlela. Kube sekuthathwa abalishumi abavotelwe kakhulu basiwa kwinhlolokhono eMnyangweni wezokuThutha ukuba bayoncintisana ukuze kuzovela othatha isicoco sokuba umshayeli ovelele wonyaka ka-2015.
Abaphume phambili bathathu, uMnu Kiss Ndlovu (33) waseStanger, uMnu Sibusiso Nkabinde (42) waseNanda kanye noMnu Sifiso Gumede (31) waseNgwavuma. Owinile uyomenyezelwa ngosuku lwemiklomelo ngoLwesihlanu.
Ophethe kwabezomnyango wokuhlola eMnyangweni wezokuThutha uMnu Bheki Sokhela ubonge i-South African National Taxi Council (Santaco) ngokugqugquzela lomncintiswano.
Umshayeli wetekisi obezoncintisana nabanye uMnu Kiss Ndlovu uthe njengomshayeli lolu hlelo lumbeka ezingeni eliphezulu. Ndlovu uthe: “Lingikhuthaza ukuthi ngisebenze kahle ngiqhubeke ngilalele abantu, ngibanakekele ngiphinde ngishayele kahle.
“Kudala saqala ukushayela amatekisi kodwa into enjena ibingekho, nozakwethu umsebenzi bazowenzisisa bawuhloniphe. Ngiyaziqhenya ngokuthola ithuba elifana naleli.”
USihlalo weSantaco KwaZulu-Natal uMnu Boy Zondi uthe: “Inhloso yalolu hlelo ukuthi sigqugquzele abashayeli ukuthi abashayele ngokucophelela, bathobele imithetho yemigwaqo baphinde banakekele abagibeli.
“Sizama nokuthi sinciphise izingozi kwezokuthutha.” - Sithunyelwe
