Publications
Partners
Indien die konstitusionele hof Christo Scholtz en John Block se aansoek om appèl teen hul skuldigbevinding aan korrupsie en gevangenisstraf van 15 jaar verwerp, sal hulle spoedig by die tronk aanmeld.
Block, voormalige Noord-Kaapse ANC-leier, en Scholtz, ’n direkteur van Trifecta, het dié belofte Maandag (27/08) in die hooggeregshof in Kimberley in hul jongste borgtogaansoek gemaak.
Die twee, wat in 2015 in die hooggeregshof in Kimberley aan korrupsie skuldig bevind is, se appèl is verlede week deur die appèlhof in Bloemfontein verwerp.
Scholtz het vroegoggend aan joernaliste gesê hy sal nie moed opgee in sy stryd om appèl nie.
Regter Pule Tlaletsi, regterpresident van die Noord-Kaap, het hul aansoek om borgtog voorwaardelik toegestaan.
Benewens die R50 000 wat elkeen teen Woensdag moet betaal, sal die ondersoekbeampte hul paspoorte hou.
Daar was verlede week verwarring of hulle binne 48 uur by die tronk moes aanmeld ná die appèlhofuitspraak, en dat hulle as voortvlugtig beskou word omdat hulle nie aangemeld het nie.
Adv. Tokkie van Zyl SC, namens Scholtz, het voorgestel dat hulle binne vyf dae vir gevangenisstraf aanmeld indien hul aansoek na die konstitusionele hof onsuksesvol is.
Regter Tlaletsi het bevind dit is onnodig, omdat die tydperk waarin iemand homself moet aanmeld, die diskresie van die griffier van die hooggeregshof is.
Die griffier het nie ná die appèlhofuitspraak ’n lasbrief uitgereik nie omdat Scholtz en Block onmiddellik aansoek om borgtog gedoen het.
Block en Scholtz kon
geen dwingende en wesenlike getuienis aanbied om die vonnis van 15 jaar gevangenisstraf te versag nie.
