Publications
Partners
Ongeveer 150 fietsryers van die Suid-Afrikaanse Polisiediens (SAPD) het van 20 tot 23 Augustus aan die SAPD-bergfietskampioenskapsbyeenkoms in Kimberley deelgeneem.
Die kompetisie het uit ’n tydtoets, ’n veldren, ’n marathon-wedren en ’n heuwelagtige skof bestaan. Nadat van die polisie se fiksste lede dit oor ’n uitmergelende paar dae uitgespook het, is die wenners aangekondig.
Kimberley se eie AO Bennie Coetzer het ’n algehele tweede plek in die mansafdeling behaal.
Hy was ’n kortkop agter die Wes-Kaap se AO Wynand Mulder.
Kapt. Herman van der Westhuizen van Mpumalanga het ’n derde plek in die kompetisie behaal.
In die vroueafdeling het kapt. Lindsay Wegner van die Wes-Kaap ’n eerste plek behaal. Sy is deur AO Natasha Harmse van Mpumalanga (in die tweede plek) en kapt. Marie Kleynhans van Noordwes gevolg.
Die provinsiale spanne het ook ’n geldinsamelingsprojek vir Caritas gehou waardeur meer as R10 700 vir dié nie-regeringsorganisasie ingesamel is.
Die volgende bergfietskampioenskapsbyeenkoms van die SAPD word volgende jaar in Gauteng gehou.
