Publications
Partners
Die Sol Plaatje-munisipaliteit moet dalk by van die jonges van die Hoërskool Noord-Kaap vir raad aanklop oor hoe om Kimberley se paaie te verbeter.
’n Span leerlinge van die skool het onlangs ’n eerste plek in ’n nasionale padboukompetisie met hul blink plan behaal om plaaslike paaie te verbeter.
Leerlinge van oor die land heen moes drie probleme in hul gebied identifiseer en dan met oplossings vorendag gekom het oor hoe om hierdie probleme op te los.
Die leerlinge, Cindy de Jonge, Shamiel Paulse, Dyllen Clarke, Luqmaan Dawray en Liam Jacobs, het ’n gebrek aan parkeerspasie naby hul skool, die slegte toestand van paaie en ongeproklameerde grondpaaie in die gebied as drie van die vernaamste struikelblokke geïdentifiseer.
Die span het met drie voorstelle vorendag gekom om hierdie probleme aan te spreek.
Die skep van aangewese parkeerplekke vir ouers en taxi’s, die verbetering van paaie in die omgewing van die skool en twee verkeersirkels naby die Hoërskool Noord-Kaap – een in Haystonstraat en een in Meyerstraat – om die verkeersvloei beter te reguleer, is hul voorstelle.
Die span moes ook driedimensionele modelle bou, ’n PowerPoint-aanbieding maak en ’n demonstrasie hou.
Hulle het ’n eerste plek in Suid-Afrika in die kategorie vir padbou in stadsgebiede behaal.
Die kompetisie word jaarliks deur die padverkeerbestuurskorporasie in samewerking met die departement van basiese onderwys en die departement van vervoer, veiligheid en skakeling aangebied.
