’n Pa wat na bewering sy eie seun vergiftig het om op sy vervreemde vrou wraak te neem, moet vandag (22/08) weer in die hof in Warrenton verskyn.
Joseph Sejeso (39) het op Maandag 8 Augustus die eerste keer op ’n aanklag van moord in die hof verskyn.
Volgens Mami Sejeso, Joseph se suster, is hy vervreem van sy vrou, Evelyn, wat ook sy seuntjie se ma is.
Evelyn het glo verlede week ’n klag by die polisie ingedien waaroor Joseph skynbaar woedend was.
Op 2 Augustus het Joseph en Katlego (4), hul seuntjie, glo ’n konkoksie gedrink. Hy het toe met Katlego verdwyn.
“Hulle is vroeg die volgende dag gevind, sowat ’n blok weg van hul huis.”
Katlego is na die Warrenton-hospitaal gebring, waar hy gesterf het.
“Joseph het uit die Kimberley-hospitaal gevlug, maar is op 9 Augustus deur die polisie aangekeer en in hegtenis geneem.”
Mami sê Evelyn is gebroke. Sy onthou haar seun se laaste ure waarin hy in geweldige pyn verkeer het.
“Snags kan sy nie slaap nie, want die voorval spook by haar. Hoe kan iemand iets so onmenslik doen? Niemand se kind verdien om so te sterf nie.
“Haar eersteling is doodgebore en nog ’n kind is twee jaar gelede weens ’n siekte dood. Ná Katlego se dood het sy net een dogter oor.”
Die seuntjie is Vrydag (17/08) in Warrenton begrawe nadat die familie skenkings ontvang het om vir die begrafnis te betaal.
Kapt. Olebogeng Tawana, polisiewoordvoerder, sê die polisie ondersoek die vermoede dat Sejeso die seun vergiftig het. Hy bly in aanhouding.