Ondanks ’n uiters uitdagende jaar vir besigheid – in Suid-Afrika, asook in Kimberley – het die Noord-Kaapse Kamer van Koophandel en Nywerheid (Nokki) se jaarlikse handel-ekspo van Donderdag (02/08) tot Saterdag (04/08) in die Mittah Seperepere-konferensiesentrum in die Diamantstad plaasgevind.
Marie Parsons, die president van Nokki, het Woensdagaand (01/08) in ’n openingstoespraak gesê dat dit nie ’n maklike jaar vir besigheid was nie, maar dat die ekspo bewys dat die feit dat die ekspo weer vanjaar gehou word wys dat ondernemings se deure oop staan en handel verwelkom word.
“Dit was ’n uitdagende jaar,” het Parsons gesê.
“Te midde van die verwisseling van senior leierskap en verskeie skokaankondigings was sakelui reeds teen die einde van 2017 vuisvoos.
“Aandelepryse het geval, en in die bestek van 72 uur is ongeveer R22 miljard op die aandelebeurs verloor.”het sy tydens haar toespraak gesê.
Ondanks hoop dat 2018 beter vooruitsigte sou oplewer, was daar ook vanjaar verskeie uitdagings.
Met verwysing na die onlangse protesoptrede in Kimberley het Parsons gesê dat die afgelope drie weke rampspoedig vir besigheid in die Diamantstad was.
Ondernemings is gedurende gewelddadige protesoptrede verwoes, sakeondernemings is gestroop en winkels is genoodsaak om weens dreigende protesoptrede hul deure te sluit.
- Dit is die vierde jaar agtereenvolgens dat die ekspo aangebied word.
Die ekspo het gegroei van slegs 57 uitstallers in 2014 tot die 160 uitstallers wat vanjaar produkte en dienste ten toon gestel het.
Parsons het hierdie groei as ’n besonderse prestasie beskryf.