Publications
Partners
DIT wil voorkom asof Astonbaai se Belastingsbetalersvereniging (ABRRA) deur vroegtydige hantering van gemeenskapsprobleme die regte knoppie gedruk het om suksesvolle samewerking tussen die Kouga Munisipaliteit en die dorpsgebied se belastingbetalers te verseker.
Die groep wat daarna streef om inwoners en munisipaliteit op aanvaarbare en vriendskaplike wyse te laat skakel, het tot stand gekom toe Paradysstrand en Astonbaai (albei Jeffreysbaaise woongebiede) in wyke 12 en 14 onderskeidelik verdeel is. Die inisiatief is geneem om saam met die stadsraad beter dienslewering aan Astonbaai te verskaf.
Die ampsdraers van die groep is Christie de Klerk (addisionele lid, verteenwoordiger en voorsitter van Buurtwag), Willie Styger (addisionele- en Buurtwag-lid wat op Astonbaai strandpatrollies doen), Ronél Brooks (kommunikasiebeampte), Pat Vosloo (sekretaresse), Jacob Smal (tesourier) en Louise Saayman (waarnemende voorsitter).
Die mees onlangse optrede van dié geïntegreerde span stuur ’n sterk boodskap aan alle partye uit dat daar nie meer verlief geneem word met klagtes wat in die lug hang en nutteloos op sosiale media versprei word nie. Inteendeel tree hulle op gereelde basis na vore om alle klagtes te ondersoek en onder die munisipaliteit se aandag te bring. Terselfdertyd word negatiewe kritiek, sonder positiewe insette, teengestaan en alle lede sterk gemaan om dit te vermy indien hulle hul stemme gehoor wil hê.
Saayman, Brooks en Vosloo het op 22 Augustus saam met Japie Smal, Robin Jantjies en mnr. Kammies verskillende probleemareas besoek en aandag gegee aan onooglike droë takke, die toestand van die Dolphinrylaan-rioolpompstasie, erwe waar randstene gelig is vir reparasie en nog nie weer herstel is nie, asook die herstel van Oswaldsingel se teerpad. Die uitslag van die gesamentlike besoek was baie positief en hulle het besluit om dit op 27 Augustus op te volg met ’n besoek aan Jantjies se kantoor.
Daar word ook voortdurend met die publiek geskakel om probleme met paaie en ander munisipale infrastruktuur onder ABRRA se aandag te bring, sodat die munisipaliteit die nodige aandag daaraan kan gee. Ledetal word ook versterk deur kontak tussen die publiek en die organisasie.
Astonbaai-inwoners kan met ABRRA skakel by abrracommunication@outlook.com of tydens kantoorure Maandag tot Vrydag (9:00 tot 16:00) by 0607469457. Hulle kan ook bereik word op hul FB-blad, Aston Bay Ratepayers en Residents Association. Voeg jouself as vriend by om op hoogte gehou te word van die jongste aktiwiteite.
Die groep se eerskomende vergadering vind plaas op Donderdag, 30 Augustus om 14:30 in die Marina Martinique-saal.
