Dr Victor kuier by Jeffreysbaai Kia Makietie

TWEE groot Suid-Afrikaanse kunstenaars sal sorg vir vermaak uit die boonste rakke by die Jeffreysbaai Kia Makietie in September.

Kurt Darren en Dr Victor vervang Emo Adams en Leah. Hulle optredes word geborg deur Kia, een van die hoofborge van Kwêla se Dorp van die Jaar-kompetisie.

Jeffreysbaai het in Junie die Dorp van die Jaar-titel gewen. Die makietie is deel van die wenprys en vind plaas vanaf Vrydag, 21 September, tot Sondag, 23 September, by die Jeffreysbaai Karavaanpark.

Die Kwêla-span sal ook daar wees om die makietie te verfilm en Luister FM sal vanaf die feesterrein uitsaai.

“Ons is baie opgewonde dat twee sulke groot name bevestig is vir die program,” sê Joe Ferreira, voorsitter van die Kouga Besigheidsforum en hoof van die makietie se beplanningskomitee.

Ander kunstenaars op die program sluit in Lollos vir die kleinspan, Wynand & Chereé, Frikkie Muller, The Triangles, Rooies en Gerhard de Jager van Luister FM.

“Ons wil graag families van regoor die Oos-Kaap nooi om by ons te kom aansluit vir die naweek,” sê Kouga-burgemeester Horatio Hendricks.

“Jeffreysbaai was die Oos-Kaapse verteenwoordiger in die Kwêla-kompetisie en die dorp se oorwinning was ‘n oorwinning vir die provinsie as ‘n geheel.”

Daar is nog stalletjie-plek beskikbaar vir die naweek. Belangstellendes kan aansoek doen vir ‘n stalletjie deur ‘n epos te stuur aan kwelamakietie@gmail.com of skakel Estelle by 082 824 3124.