Honde van kant gemaak ná aanval

DIE twee pitbulls wat ’n 67-jarige vrou en haar twee honde in Jeffreysbaai aangeval het, sal van kant gemaak word.

Die vrou is een van drie mense wat ernstig beseer is nadat die honde Maandagoggend uit ’n erf gekom het.

Benewens die vrou se ernstige beserings, is een van haar twee honde ook deur die honde verskeur.

Na verneem word het die honde glo oor ’n grensheining gespring en reguit op die vrou en haar honde afgepyl.

Sers. Majola Nkohli, ’n polisiewoordvoerder, sê die vrou het in Kabeljousweg gestap toe sy aangeval is.

Twee mense wat die voorval gesien het, het die vrou te hulp gesnel. Die twee mense is blykbaar ook deur die honde beseer.

Nkohli sê al drie die mense is vir behandeling na ’n hospitaal geneem en die Dierebeskermingsvereniging (DBV) se hulp is ingeroep.

Natasha Barnard, voorsitter van Humansdorp se DBV, sê die beseerde vrou se een yorkshireterriër is op die toneel dood. Die tweede hondjie het weggehardloop en is later weer teruggevind.

Volgens Barnard het die eienaar van die pitboele reeds Maandag die twee honde aan die DBV oorgeteken en hulle sal op die eienaar se instruksies van kant gemaak word.

’n Saak van die oortreding van die Wysigingswet op Diere-aangeleenthede, ’n ondersoek wat bepaal of nalatigheid daartoe gelei het dat die diere beserings aan ’n ander persoon veroorsaak het, word deur die polisie ondersoek, sê Nkohli.