Publications
Partners
DIE appels gaan eersdaags behoorlik in die Langkloof swaai - of eerder val.
Elke eerste naweek van September kom skiet-entoesiaste van reg-oor die Oos- en Wes-Kaap op die plaas Tulpies-kraal in Joubertina bymekaar om mekaar die stryd aan te sê, tydens die Langkloof Skietklub se Appelskiet-kompetisie. Vanjaar is geen uitsondering nie.
Dié kompetisie is een van die grootste geleenthede wat hulle as klub aanbied en lok mense van George, Humansdorp, Port Elizabeth, Oudtshoorn en omliggende gebiede.
Dié kompetisie is ’n lekker dag vir die hele gesin. Terwyl die ernstige skuts met groot kaliber-gewere skiet, word die kinders bygestaan om met die .22 te skiet. Die kleiduif-skiet is ’n groot treffer onder die vroulike geslag, en moenie dink dat hulle vir ’n haelgeweer skrik nie.
Daar sal ses verskillende bane wees en vyf skote per baan sal toegelaat word.
Daar word onder meer op die volgende aangelê: ’n Appel op ’n riet, teikens met diere op soos hulle in die natuur voorkom, valplate, ’n vlakvark wat op ’n kabel beweeg en ’n springbok met ballonne.
Wat die verskillende bane interessant maak, is dat niemand die afstande van die teikens ken nie en niemand mag die afstande met ’n “range finder” bepaal nie. Al die teikens word op ’n afstand van tussen 30m en 300m geplaas.
Pryse sal in die volgende kategorieë toegeken word: junior (16 jaar en jonger), dames, senior (60 jaar en ouer) en ope.
Die Langkloof Appelskiet-kompetisie vind op 1 September vanaf 07:30 by die Langkloof Skietbaan net buite Joubertina plaas. Die inskrywingsgeld is R250 per persoon.
Vir inligting, skakel Bokkie Kritzinger by 083 444 2365, Johan Muller by 079 517 6908, Wicus Linde by 082 776 3486 of Renhard Oelofsen by 082 456 0260.
Stuur ’n epos na skietklub@langkloof.net.
