Publications
Partners
DIE ‘strydwekkende’ Paradys Skibootklub in Paradysstrand net buite Jeffreysbaai trek eersdaags ’n nuwe baadjie aan.
Na jare se ontwettige gebruik, is die skibootklub-gebou tydens ’n ope tender deur die Kouga-munisipaliteit aan die plaaslike buurtwag, Paradise Watch, toegeken.
Kouga-burgemeester Horatio Hendricks sê: “Die uitsetting van die onwettige huurders wat sonder enige huurooreenkoms ’n besigheid bedryf het, is ’n ware suksesverhaal.
“Die skibootklub is al jare terug ontbind, en die gebou sal nou as ’n gemeenskapsentrum gebruik word. Dit is ’n wonderlike fasiliteit vir die Paradysstrand-gemeenskap wat voorheen nie toegang tot ‘n eie gemeenskapsaal gehad het nie.”
Volgens Paradise Watch-voorsitter, Riaan Kolesky, sal die gebou hoofsaaklik as ’n basis vir die buurtwag gebruik word.
“Paradysstrand het onlangs ’n brandwa van die munisipaliteit ontvang om met brandbestryding te help,” sê Kolesky.
“Dit, tesame met ander brandbestrydingtoerusting, sal in die gebou van die ou ski-bootklub gehuisves word.
“’n Beplande kamerastelstel, wat toegang tot die woonbuurt sal monitor, sal ook hier gehuisves word. Dié stelsel sal die opvolg van kriminele oortredings deur die buurtwag en wetstoepassers vergemaklik.
“Verder sal die huidige radiostelsel, wat tans in ’n manstoilet geberg word, na die klubgebou verskuif word.”
Kolesky beklemtoon: “Die gebou behoort heel eerste aan die gemeenskap en met hul insette sal daar besluit word waarvoor die gebou verder aangewend moet word.”
Die Paradise Watch vergader op 9 Augustus om 10:00 by die klubgebou om die toekoms daarvan te bespreek. Alle Paradysstrand-inwoners is welkom om die vergadering by te woon.
“Alles wat ons doen, is vir die gemeenskap,” sê Kolesky.
