SKOOLHOOF Eulian Lloyd van die Andrieskraal Primêre Skool in Patensie, vat eersdaags die langpad vir beter onderrig.
Lloyd, wat sedert April, verlede jaar aan die stuur van sake staan, beoog om volgende maand ’n 20km-staptog vir fondsinsameling aan te pak. Fondse sal aangewend word om ’n grondslagfase-onderwyseres aan te te stel.
Die vorige onderwyseres, Lea Maphomey, het aan die einde van die tweede kwartaal afgetree het, en ’n belangrike pos oopgelaat.
Volgens Lloyd is ’n tydelike onderwyseres in haar plek aangestel, maar die beheerliggaam se skraps fondse kan nie die bykomende onkostes dek nie.
“Die pos moet nog deur die Departement van Onderwys adverteer word,” sê hy. “Dit is egter hoogs onwaarskynlik dat iemand voor die einde van die derde kwartaal aangestel sal word.
“Ek het besef dat ons dringend van elders ’n paar sente bymekaar sal moet skraap. Ek het dadelik aan stap gedink. En so is die eerste Big Walk for a Teacher in Every Class gebore - my stokperdjie wat nou vir ernstige sake ingespan word.”
Lloyd sal op 21 September vanaf die skool tot by Patensie stap - ’n stewige 20km.
Maar hy sien beslis kans daarvoor en oefen reeds hard vir die groot dag.
Hy doen ‘n beroep op sake-ondernemings en individue om hom per kilometer te borg.
“Dat sal wonderlik wees as ons genoeg fondse kan insamel om nie nét die tydelike grondslagfase-onderwyseres aan te stel nie, maar ook ’n addisionele onderwyser,” sê die skoolhoof.
“Andrieskraal is ’n multi-graad skool: 156 leerders met slegs vier onderwysers, wat myself en die tydelike onderwyseres insluit.
“Die ideaal sal wees om ’n onderwyser vir elke graad te hê.”
Vir meer inligting, skakel Lloyd by 073 025 4343.