.
.
’n Vrou wat in ’n plaasaanval met ’n skroewe-draaier in die nek gesteek is, kon daarin slaag om een van haar aanvallers te wond.
Die 48-jarige vrou is Vrydagaand oorval in haar kantoor op ’n plaas in die Kabeljauws-omgewing naby Jeffreysbaai.
Kapt. Gerda Swart, ’n polisiewoordvoerder, sê die vrou was in haar kantoor op die plaas besig om administratiewe werk af te handel.
Dit was onstreeks 20:30 toe sy vreemde ge-luide buite haar kantoor hoor.
Eers nadat die vrou twee gewapende aanvallers voor die venster gesien het, het sy besef dit is nie haar man wat buite rondbeweeg nie.
“Een van die verdagtes het op die vrou begin skiet en sy het terugbaklei,” sê Swart.
In die struweling is die vrou deur een van die aanvallers in die nek gewond, vermoedelik met ’n skroewedraaier. Die vrou het ook ’n vuurwapen by haar gehad en verskeie skote afgevuur. Een van haar aanvallers is in die bolyf getref, sê Swart. Die gewonde verdagte is na ’n plaaslike hospitaal geneem waar hy onder polisiebewaking versorg word. Hy sal in die landdroshof in Humansdorp verskyn sodra hy uit die hospitaal ontslaan word. Volgens Swart is die verdagte se makker nog soek.
