Bakhuculule indawo yokulahla engekho ethethweni

KUKHUCULULWE indawo yokulahla udoti engekho emthethweni eMbali Unit BB5 ngoMgqibelo mhlaka-2 kuNdasa (March).

Lokhu kulandela ngemuva kokuba kwavela izindaba zokuthi sekukhona abantu abaze baphoqeleka ukuba bavale izitolo zabo eziseduze kwalendawo ngenxa yephunga elibi ebeliphuma khona.

Lo mkhankaso usungulwe amavolontiya enhlangano i-ANC khona endaweni kanti futhi athi azimisele ukuqhubeka nawo ukuze kusizakale umphakathi. UMnu David Ndlovu nobekhona ngesikhathi kuqhutshwa lo mkhankaso uthe kubaphatha kabi ukuzwa ukuthi kunabantu esekuze kwabaphoqa ukuba bavale izitolo ngenxa yokulahlwa kuka doti ngokungemthetho.

“Abantu bakithi abaningi siyazi ukuthi baziphilisa ngokudayisa ngakho ke akumele baze bavale amabhizinisi abo ngenxa yodoti olahlwe ngokungemthetho. Okusiphatha kabi kakhulu ukuthi sekukhona nabantu abafikayo abaphuma ngaphandle bafike bazolahla ngezimoto lana sengathi vele lena indawo eyakhelwe ukulahla,” kubeka yena.

UMnu Ndlovu uthe lena akuyona kuphela indawo ekulahlwa kuyona udoti ngokungemthetho kodwa baqale ngayo ngoba iyinkinga kakhulu. Uthe bazoqhubeka babheke ukuthi abantu abalahli yini. “Sifuna ukuyilungisa lendawo siyiphendule insimu ukuze kuzobanzima kubantu ukuthi balahle lana. Sizocela ukusebenzisana nabomakhelwane ukuba babeke ihlo kulabantu abalahlayo.”