Ushaywe washona osolwa ngokweba e-Ashdown

UTITINYWE ngesibhaxu waze washona owesilisa osolwa ngokweba endaweni yase-Ashdown.

Lo mlisa ebelingakatholakali igama lakhe ushaywe amalungu omphakathi ase-Ashdown waze washona ngoMgqibelo mhla ka-4 kuNcwaba (August) khona kule ndawo.

I-Echo ithole ngomthombo wayo othembekile wakuyo le ndawo ukuthi umufi ubevele efunwa umphakathi kulandela izigameko eziningi zobugebengu okusolakala ukuthi ubezenza kuyo le ndawo.

Ikhansela lakule ndawo uMnuz Dumisani Phungula uthe umufi ubesolakala ezigamekweni eziningi zokuntshontsha kule ndawo.

Uthe umufi ubesolwa ngobugebengu kubalwa ukugqekeza ezindlini, ukubamba inkunzi kuhlonyiwe, ukuntshontsha izimoto kanye nokweba.

“Umufi ushaywe wabulawa amalungu omphakathi abedinwe egane unwabu.

Kuthiwa umsolwa ubesebenza nentombi yakhe ukwenza bonke lobugebengu endaweni.

“Nakuba umufi esolwa ngobugebengu asihambisani neze nokuthi umphakathi uzithathele umthetho ngezandla.

“Kumele sibambisaneni ekulwisaneni nobugebengu siwumphakathi kodwa-hhayi ngokuthi sizithathele umthetho ngezandla.

“Uma amalungu omphakathi ebona ubugebengu endaweni yawo, kumele babike kwiziphathimandla zomthetho kube yizona azenza umsebenzi wazo,”kubeka yena.

UMnuz Phungula uthe okuyinkinga kakhulu ukuthi indawo yase-Ashdown yakhelene nesiteshi samaphoyisa iPlessislaer kodwa amaphoyisa awafiki njalo ezohlola le ndawo noma ezoqapha izigebengu kule ndawo.

“Izinga lobugebengu likhulu kakhulu endaweni yase-Ashdown kanti nomphakathi nawo ukhathele awusafuni lutho.”

Kolunye udaba oluhlukile kubulawe omunye umuntu khona endaweni yase-Ashdown ngemuva kwengxabano yotshwala ebe khona.

Okhulumela amaphoyisa eMgungundlovu uSergeant Mthokozisi Ngobese usiqinisekisile isigameko wathi bekungakaboshwa muntu.

Amaphoyisa aphenya icala lokubulala.